「星二代」唔一定要入行做星星，不過有「星之光環」，人群中當然特別出眾，當年的「氣質美女」葉晨，婚後生下一對仔女，大女蔚藍（Stephanie）二十三歲，陽光美女好有性格，在美國Loyola Marymount University讀書，一早講咗對娛樂圈冇興趣，二十一歲仔仔偉衡（Matt）又係去咗美國讀書，高大威猛好上鏡，同樣對娛樂圈冇興趣，葉晨當年為一對仔女退出娛樂圈，講到明左擁右抱好滿足，專心湊大仔女拒絕復出，仲為仔女練得一身好廚藝，將多年烹飪心得出咗兩本書教人煮餸，仲做埋Food Stylist，以身作則教仔女做人，最緊要可以做自己喜歡事！
葉晨細個時移民美國，因為發燒外耳道發炎冇及時治療令右耳失聰，她在大學主修特殊教育，畢業後返香港在特殊學校做老師，被劉天蘭發掘入行拍戲，雖然失聰但氣質獨特，外型又省鏡有好多拍戲機會，八、九十年代撞正三級片熱潮，葉子楣、陳寶蓮、翁虹、溫碧霞、李麗珍等，幾乎個個都抛個身下海拍三級片；葉晨有氣質又有性格，片商不斷向她擲銀彈，利誘佢露點拍三級片，露三點唔得露兩點都收貨，但佢話唔拍就唔拍，推咗二十幾部電影，咁有性格的女仔一早名花有主，九三年與拍拖八年的男友王先生在新加坡秘密結婚，婚後好快做媽媽，依家仔大女大唔駛佢操心，大把時間鑽研廚藝煮多哋好餸。
