《2023香港小姐競選》到越南拍外景，去到第四日行程依然緊密，16位佳麗除在下塌酒店打高爾夫球外，還到了當地特色景點稻田及磚房進行拍攝，穿長裙上陣的佳麗，在稻田美景及磚屋中大擺型格甫，其中6號胡睿涵（Hanna）、7號毛志琛（Viktoria）及8號姜依宁（Jenny）因身形高䠷，被封「硬照三人組」。
同行的嘉賓主持黎諾懿，對佳麗的貼心照顧，引起了她們的共同話題。15號莊子璇（Hilary）對諾懿真人與鏡頭前一樣搞笑大感驚喜：「佢成日講爛Gag，都幾搞笑，同埋叫我哋叫佢做諾仔。」3號鄧凱文（Eris）及Viktoria等則輪流大爆黎諾懿暖心行為，Eris說：「佢好照顧佳麗，好似我跳舞好差，佢會鼓勵我要有自信。」Viktoria說：「我有過敏，佢就叫我問佢女助手拎藥，叫女助手幫我搽。」
除了貼心，第一天拍攝便記熟所有佳麗中、英文名字的諾懿更獲封「記憶小王子」，對此他笑言有秘訣，並「撒嬌」指今屆佳麗英文名太艱深：「其實我記得曬係靠出貓不斷問人架咋，難記嘅名我都交曬畀梁凱晴，我人生最怕記資訊嘢同人名。同埋佳麗啲英文名好深，又Zora、又Eris、又 Lovelle，我平時叫開Mary咋嘛。」
至於因在社交網自我介紹中自稱「Single Mom」惹揣測的2號黃泳嘉（Jessica），首度回應事件：「我唔知廣東話有冇呢句說話，我嗰時喺加拿大有樣嘢叫Mom Friend，通常指好鍾意照顧人嘅朋友。我喺加拿大嗰時住寄宿學校，我係好照顧啲同學，佢哋個個都話我係媽咪，呢個（自我介紹）只係Inside Joke。」Jessica還自爆手袋是百寶袋：「我會帶好多食物、膠布、紙巾、毛巾等等咩都有，如果有人有嘢要，我一定有喺手，所以好似媽咪咁。」
另無綫官網上周一開始進行的「你最Like的心水佳麗」投票活動，今午公布首周投票結果，暫時頭五名依次為17號王敏慈（Lovelle）、16號郭珮文（Juliana）、13號陳曉彤（Cindy）、15號莊子璇（Hilary）及12號梁晶晶（Nicole）。
