《2024香港小姐競選》15強佳麗日前齊集拍攝官方造型照，分別以最簡單黑、白背心上陣，官方近日亦陸續釋出以「2024香港小姐冠軍可能係…」為主題的宣傳片，15位候選佳麗模擬奪冠情境兼分享性格特質。
其中年紀最小、只有18歲的1號陳紫佟動作多多大擺可愛Pose，惟期間不慎弄跌頭上后冠，相當遴迍。有「城大李嘉欣」之稱的2號倪樂琳則自爆最愛瞓覺，更腦筋急轉彎地以此勸勉香港人要多放鬆：「我係長睡眠者，中學時候試過連續瞓咗廿幾個鐘，我懶嘅呢個特質，可以鼓勵香港人勞逸結合。」12號鍾翠詩則指自己是一名勇敢女生，並自信十足謂：「我覺得自己好勇敢同埋自信，可以代表香港作為親善大使宣揚香港，展示香港嘅美。」
有「翻版蔡潔」之稱的13號姜程月，則自覺特質是親和力和抗壓力：「我有親和力可以拉近同觀眾嘅距離，同埋覺得自己有比較大嘅抗壓能力。」被指撞樣Race@2R的9號陳甜甜自我介紹環節則展現了烈女的特質：「我覺得自己膽大心細、有愛心，人生中會遇到好多困難，但我從來唔會退縮，我覺得呢啲困難都係可以成就到（更好嘅）我。」
至於參選以來以高身形備受關注的14號楊梓瑤，透露想做演員竟全因劉亦菲：「我2021年睇電視見到劉亦菲，嗰陣時起我就好想做演員，好多謝媽媽好支持我。」自我介紹環節同樣令人Impressive的，還有毅力及意志力驚人的15號俞可程，為了以更佳姿態參選港姐，事前進行了地獄式減肥：「我喺2個月減咗14磅，雖然好辛苦，但我性格係一決定咗就要做，即使結果點樣都好，努力咗就好足夠。」
另外屬於「閱歷型」的佳麗，有7號秦冀雯和8號盧凱怡，7號秦冀雯來自南京，靠着自學講得一口流利廣東話，非常叻女，她亦自認自己十分獨立：「我細細個就出咗去讀書，所有嘢都係靠自己去解決，過程中不斷咁成長，變得更加成熟同堅強。」擅長國標舞的8號盧凱怡，則坦言喜歡在舞台上發熱發亮：「我一直以嚟都好有自信，上到台時好少會去擔心同驚，好享受舞台上嘅感覺。」
