溫碧霞一家三口遊樂園迎父親節　囝囝放暑假返港變得高大成熟

Irene享受家庭樂又影靚相超開心。

溫碧霞（Irene）兒子何國倫（Xavier）日前由美國放暑假返港，Irene和老公何祖光(Kenny) 即放下工作，帶囝囝到海洋公園遊玩兼餵企鵝，順道慶祝周日的父親節，享受天倫之樂。

同老公玩得勁開心。

相中的Irene親手餵企鵝吃魚仔，又和老公擲公仔，童心未泯，其中一張一家三口溫馨的背影合照，Xavier已經高出Irene大半個頭，身形跟爸爸一樣高大，身旁的Irene顯得十分嬌小。

囝囝已高過Irene大半個頭，似有2座靠山。

Irene和囝囝已經有幾個月不見，今次團聚她大讚囝囝變得成熟：「佢大個咗好多，講嘢好成熟，已經好有自己諗法，時間真係過得好快，今次一家人喺埋一齊好開心，難得有假期，呢兩個禮拜有時間都會陪佢哋去玩，下星期又會去迪士尼玩。」

下個月Irene會暫停工作，專心陪囝囝放暑假，她表示：「暑假都會多啲陪佢哋，下個月我哋會去峇里島過生日，跟住一齊會去日本，希望佢過一個開心嘅暑假。」