ViuTV上月舉行《ViuTV年中無休2024節目發布會》，當中王賢誌（Vinci）擔任製作人兼主持的男男真人騷《仔仔一堂》第二季《Boyscation Too》，竟由無綫搬到ViuTV播出，隨即引起熱論，不過網民卻十分支持，認為節目在ViuTV播出更合適、尺度更大。
第二季將有12位新「仔仔」加入，除了香港亦有內地參加者，最小的只有20歲。Vinci王賢誌Vinci︰「咁多年TVB、ATV、有線、Now都做過，唯獨Viu開台咁耐都冇接觸過，今次真係算破天荒和嘔心瀝血。呢次拍攝全部資金都係自己，亦親自去搵贊助，的確因為Viu關係，搵參加者都刻意搵比較young，最後生只有20歲、廿幾歲都有幾個，他們這一代好主動好直接，鍾意邊個就會講，今次競爭都幾激！同上輯唔同，好多錯綜複雜的感情線，好多drama好激，drama並唔係要他們做戲，今次仍然沒有劇本，不過，甚麼平台都好，都只希望接觸到更多人，而且節目最後都可以在YouTube看到，所以甚麼平台都OK！」
第二季沒有公開招募，Vinci繼續親自四出搵「仔仔」，他說：「自己搵，冇辦法公開招募，雖然上次都算成功，但大家就更加忌諱，原來真係咁多人睇，而且我想搵嘅唔係要想做藝人要出名嗰啲，我要搵素人，因為如果有人想紅，佢就會喺節目入面用好多方法出位，咁就冇咗節目本意！問咗幾十人，今次不止有香港，更有內地參加者，但大前題要識講廣東話，要似香港節目，因為要翻譯又冇咗個即時反應。」
今次Vinci繼續擔任主理人、監製和主持，「《仔仔一堂》迴響好大，世界各地都有好大正評，起初一些負評，都是大家懷疑節目內容，又有些誇張報道，節目出街百份之九十九都很支持，無論是gay或是直都有捧場客，節目訪問了很多LGBT機構，好多信息。今次除了有這個形式外，亦加了一些新意，上次疫情之下拍攝，要留在香港，今次終於可以飛到峇里，一齊住、一齊拍節目更加豐富。剛剛拍完，剪接需時，我諗應該要巴黎奧運之後先有得睇！」《Boyscation Too》在ViuTV節目巡禮預告後，除了香港，連泰國與越南等外地傳媒都有報道，令Vinci打下強心針，不過說到節目內容，他就非常口密，表示遲些會有驚喜給大家。
