鄭秀文（Sammi）昨晚（20日）在紅館舉行第七場「You & Mi 鄭秀文世界巡迴演唱會2023」（Rescheduled），COLLAR擔任表演嘉賓，並送上巨型薯片背囊作禮物，令Sammi開心不已，散場時更背着薯片背囊跳跳紥收工。另外，昨晚Sammi與許志安再合唱《世紀末煙花》，她感觸得灑淚，安仔則以微笑和點頭作回應。
Sammi介紹嘉賓出場時，形容是夜邀請的嘉賓比較得意，「因為我請嘅唔係『一個』嘉賓，而係『一隊』嘉賓，女仔、好跳得，所以佢哋話揀呢首歌，大家一齊跳。」當音樂響起，觀眾即起哄歡呼，COLLAR升上舞台與Sammi跳唱《煞科》。之後Sammi說：「多謝COLLAR為今晚添上一股青春原動力！今次我請嘅嘉賓都比較特別，乜嘢範疇都有，有新晉嘅，亦有大家比較熟悉嘅。COLLAR，你哋覺得自己係新人定係咩呢？」Marf說：「永遠都係新人！」Sammi認同地說：「講得啱喎，其實活到老真係學到老，我都要保持做新人嘅心態去學習，尤其是喺呢個圈，不進則退，如果唔係我點可以依家仲開到演唱會呀？希望你哋有更好發展，今日我交個舞台俾你哋，贏唔贏到觀眾掌聲就靠你哋啦！」
當Sammi準備離場時，突然被COLLAR叫停，並表示準備了一份禮物，原來是一個由很多薯片組成的大背囊，Sammi看到後「嘩」了幾聲和哈哈大笑，立即背上身，直呼「好正」！她又興奮地跳唱了幾句《IQ博士》才離場。接着，COLLAR即獨自跳唱《idc》。
Sammi在Encore環節，演唱《盲盒》後，全場大合唱《如果我們不再見》、《不要驚動愛情》和《我們都是這樣長大的》，期間她拿起今次演唱會毛巾紀念品滿場飛，並與歌迷約定一起變老。
完場後，Sammi背着COLLAR送的薯片背囊，蹦蹦跳跳地離開紅館，她說：「終於完成第七場演唱會，好開心，多謝COLLAR送俾我嘅薯片背囊，我對呢份禮物非常滿意，仲開心過送鑽石俾我。我懷着開心嘅心情，希望今晚嘅觀眾都睇得開心。由於最近啲病菌都好緊要，都仲係COVID，好多人受感染，所以無握手（環節）。我依家收工啦，返去食宵夜啦！」
