昨日（1日）Gin Lee李幸倪現身銅鑼灣的英皇娛樂期間限定概念店「0 e:ffect Concept Store」，為推出限量七吋黑膠唱片舉行見面會。
其實早於活動前幾日，Gin已專登到concept store將全部限量黑膠簽名，認真愛錫fans。見面會當日，首一百位訂購唱片的幸運粉絲，一早到場排隊，等待Gin親手送上簽名黑膠唱片。Gin好奇問道：「我問佢哋屋企有黑膠唱片機咩？佢哋有啲話冇，有啲就話因為呢隻黑膠，所以會專登去買返部黑膠唱片機，好感動呀，好多謝佢哋支持！」現場所見，歌迷十分有秩序地排隊，Gin除了送上黑膠，亦逐一跟歌迷合照，當時有不少顧客於concept store內，當見到Gin時除了十分開心，更大叫：「真係見到明星呀！」十分搞笑。
送完一百張黑膠後，fans們聚集於店外不肯離去，加上不少途人駐足圍觀，場面熱鬧，隨後Gin便走到透明櫥窗的busking位置，跟大家say hello及多謝大家出席支持，最後便跟全場來個大合照。事後Gin表示：「頭先企喺busking位，其實同啲fans好近距離，只係一塊玻璃之隔，近到有啲fans伸手出嚟同我隔住玻璃掂住隻手，好搞笑；同埋其實我企喺裏面，完全聽唔到出面嘅聲，佢哋口擘擘咁樣，好得意，有試過想讀唇㗎，但搞唔掂，哈哈！」她又謂現在充滿電，回到工作崗位，「跟住落嚟就要繼續做新歌，今年剩返幾個月，要繼續衝埋佢！」
另外，黑膠唱片收錄了《Dum Dum（I’m Not Dum Mix）》及《企好》兩首作品，Gin表示特別揀選了這兩首歌放於黑膠中，對她來說別具意義，「兩首都係上年作品，兩首無論喺音樂排行榜同頒獎禮上，都得到好好成績。《Dum Dum》係我嚟到公司後第一首歌，亦都係第一首五台冠軍歌，曲風同影像同以往好唔同，發掘到另一個面向嘅自己，歌詞又好洗腦啦，啲人以為歌名係『肯定就是你』，哈哈；至於《企好》係第二首五台冠軍歌，所以特別有意思！」
