由韓國風靡至全球的「MBTI十六型人格測試」，從林家謙Terence的歌曲，樂迷一致選為他是「i人」（Introversion內向）的代表。家謙最近推出第四張專輯，亦把自己的人格測試植入，新專輯《ISFP》解作「I人之境」、「S人之感」、「F人之緒」及「P人之變」。
家謙說其中一首歌《有你聽我的故事》是總括了「ISFP」人格的感受，他解釋︰「一種渴望被聆聽，儘管我覺得『ISFP』嘅人平時大部分傾向摺埋，好收埋自己，但其實都希望有聆聽自己心聲嘅耳朵，無論係比較close嘅朋友、樂迷又好、或者唔認識嘅人都好，我都希望大家有共鳴，儘管自己可能同呢個世界有啲距離，無論咩型格，其實大家都有啲相同嘅地方。我身邊比較多圈外嘅朋友，我覺得相處會舒服啲，唔知點解，就好似返工都唔會鍾意跟同事hang out啩？我諗我收工會想同屋企人食飯，唔會係同事，識咗好多年嘅朋友，我就會傾，唔會話好多，但又唔缺囉，依家覺得好足夠。」
「當我透明得㗎喇」
新專輯家謙亦希望為「i人」平反，「有好多人以為『i人』唔鍾意講嘢或者點點點，我覺得大家有少少誤解咗，只係一種心態取向，或者自己最舒服狀態，另一個『i人』李榮浩都有『e人』嘅一面，例如佢做節目做show大家就會見到，只係工作以外，想歸於平凡嘅自己，我哋都係偏向呢一種。」《社交恐懼癌》其中一句歌詞「不要遞我眼神試圖邀請我加入」，就是家謙的心聲，「係呀，千祈唔好望到我，唔使理我，當我透明得㗎喇，尤其是多人嘅地方，有時唔想傾偈，『i人』就係咁。」
問家謙身邊的朋友都是『i人』嗎？「屋企人呀，或者close啲嘅朋友多數都i，但都有唔少e，好似Eason真係『e人』，較外向和喜歡社交，跟住Serrini、Tyson都應該係e，但係佢哋扮自己係i，跟住我話，如果你哋都係i，咁冇人係e㗎喇，其實做MBTI個test，都有『造馬』嘅成分，因為係一直咁答啲問題，而你知道會引導到去乜結果，某程度上係有操控嘅成分，所以我比較相信從同佢哋相處而得知大概嘅性格，知佢哋咩料啦，儘管佢哋話自己係『i人』，我係唔會理佢哋。」
「i人」永遠只看眼前的事物，甚少回望過去的自己，近年是頒獎禮常客的家謙，每次得獎的反應都很平淡，「有時都覺得自己係咪有啲問題，對獎項嘅喜悅不是十分大，嗰刻跟住之後過咗就過咗，好似冇乜點樣去好enjoy過個moment，我性格就係咁，可能係ISFP其中一個特性，好focus現在，唔會特別諗之前嘅嘢，又唔會諗好長遠嘅嘢，呢一刻我開心，過咗就係第二個moment，就會去諗第二個moment發生嘅嘢，我好少會眷戀住過去。」
獎座放在家中角落
由入行至今的獎項，家謙都有好好保存，「獎放晒喺家中某個角落，我都冇乜點特別檢視嗰啲獎，如果要問我邊個特別有意義？應該係作曲人獎，本業上獲得嘅獎係最開心嘅，歌手嘅獎都開心，不過有時覺得係有少少僥倖，我一直都覺得歌手上的認可，未輪到我咁快得到，自己知自己咩事啦，我唔係大家會認可唱功上好勁嘅人，所以喺唱歌上面嘅獎項，我睇得淡，我唔會覺得需要有啲咩認可，你唔認可我都OK，因為我真係未到嘛，作曲上，我覺得自己作嘅歌係幾好聽喎，獲獎開心同埋合理囉。」
性格直接影響了家謙的唱歌事業，從幕後走到幕前，足足用了五年時間，「其實間中有時都會擺吓啲片上網，依家都收返晒，因為覺得唔係咁好聽，雖然亦有人會話鍾意，話覺得聲音幾特別，但好多人聲音都好特別，又唔一定好聽，所以我對自己嘅唱歌唔係太有信心，猶疑咗好耐，又想行又唔行。」
最後一九年家謙才正式出道做獨立唱作人，三年後便在紅館舉行一連七場的演唱會，去年更於倫敦世界級表演場地O2 Arena開騷！「諗返其實七場真係超越咗自己極限，原本覺得三、四場頂盡。」Eason當然為家謙擔任嘉賓，情緒甚少高低起伏的家謙，被Eason一個驚喜引爆淚點，「當時係非常大壓力，因為啱啱發生『事件』(MIRROR演唱會意外)之後，要處理一個大show，覺得好難handle，其中一日rehearsal時，我唔記得我唱邊首歌之後就頂唔順行去後面度喊，之後Eason來到，跟住就安慰我啦，嗰晚本來同佢合唱《致明日的舞》，但佢同隊Band一齊瞞住我，偷偷地擺咗《今日》落個rundown度，一聽到就有啲失控囉。」
封面攝影︰Alexander Yeung
封面攝影協力︰Gwen
花絮攝影︰洪志富
形象︰Nana Wong、Anthony Tong
造型協力︰Music Ho、Ingrid Ma、Kelly Janice
化妝︰Dera Tse
髮型︰Cedric Tsang
服飾︰LOUIS VUITTON、PRADA、LOEWE、CHRISTOPHER RAXXY、CHAUMET、BVLGARI、Tiffany & Co.、GENTLE MONSTER FROM PUYI OPTICAL
