一共四集的育兒真人騷節目《學神爸媽Get Set Go！》今晚（30日）開播，首集嘉賓是新手爸媽袁偉豪（Ben）與張寶兒（Bowie），及育有一對子女的吳若希（Jinny），「個案主角」是3歲小妹妹Yaris。
三位嘉賓的首個任務，要在30分鐘內氹掂Yaris一齊唱歌，並從互動中找出Yaris難湊原因。Jinny打頭陣上場，嘗試以「BB音」與Yaris拉近距離；第二位上陣的Ben則化身大細路與Yaris玩扭蛋機，之後借意問Yaris可否送他一個公仔，可惜Yaris扯到實唔願放手，Ben最後只能出絕招作狀扮喊搏同情。最後出場的Bowie則成功以退為進氹掂Yaris合唱，是三人中唯一成功的挑戰者。
這個環節的亮點是，Ben出場時故作不經意地說：「嘩！有夾公仔機喎，幾好玩喎」，企圖自然地與Yaris打開話題；Jinny見狀即笑向寶兒說：「Feel到Ben哥之前點樣追求你，扮經過冇同你講嘢，但其實一路撩緊你講嘢。」任務失敗的Ben，事後更歸究於自己的留鬚及長髮造型嚇親妹妹。
其實3歲Yaris難湊的原因是同齡小朋友常見的問題—「不願意分享」，三位嘉賓的終極任務是要陪Yaris夾她最喜歡的公仔，並要扭六壬令Yaris自願親手送上公仔，難度堪稱地獄級！出名認真的Ben打頭陣，並出動「冷面湊B大法」，對着3歲的Yaris狂講大道理：「你唔好誤會以為夾到就係俾你。」一心只想要公仔唔想聽道理的Yaris即時淚腺失陷喊到「扯蝦」，Ben即時被震撼：「你放鬆啲先，喊就冇公仔喇！」最終被逼上梁山的Ben出招玩「棄權」，無晒符的他對着爆喊的Yaris說：「你行過隔籬房問Bowie姐姐可唔可以俾呢隻公仔你？」Bowie見狀即時大嗌：「搞錯，掟番個波俾我？幻想到未來係點！」
被擺上枱的Bowie登場救亡，一出場便極盡溫柔地攬着Yaris連番安慰，豈料就在快要成功一刻、「心急豬隊友」Ben又出現「搞搞震」，他先向Yaris說：「快啲問Bowie姐姐可唔可以送（個公仔）俾你喇。」再向Bowie說：「佢想要呀，送俾佢啦！」雖然Ben心底一心想實際地「送公仔」氹番Yaris，但由於打斷Bowie原本悉心部署，遭老婆即時勒令封嘴：「你唔好嘈住先，你俾佢自己講啦，喊都唔俾人喊！」最終Bowie以一招成功冧掂Yaris唔再喊兼平伏情緒，連有七年湊小朋友經驗的Jinny亦甘拜下風謂：「Bowie將會係非常非常好嘅媽媽！」
