劉永昨日發通告約傳媒爆料，表示墮入睇樓團騙局，在廣州黃埔區購入兩幢複式新房屋，預先繳交人民幣$60,000訂金「留樓費」，簽完約才發現所買的樓，只有二十年租權沒有業權，二十年後要再續租，而且之前講好「拎包入住」有裝修，怎知合約寫買的是「清水樓」，不單沒有裝修，連講好的複式單位也變成一間吉屋，沒有任何樓層和間隔。 他說：「我發現有問題不想簽正式合約，發展商表示不完成交易，就要賠百分之二十的違約金，即係十二萬，好彩傳媒昨日報道後，晚上八點已經收到發展商電話，約我今早去廣州解除合約，我話約咗記者唔得閒去廣州，發展商代表親自到深圳和我見面，今早八點在深圳簽好解約書，即時俾番六萬訂金，我再趕返香港同大家見面，今次真係好多謝傳媒幫手，峰迴路轉順利攞番六萬元訂金。」
劉永承認今次自己衰貪心，因為一直想幫十六歲大仔劉嘉豪，及十二歲細仔劉家傑置業，以為趁大陸樓價跌執平貨，怎知貪字變成貧幾乎損失養老金；他表示經常收到睇樓團來電，遊說他去大灣區置業，他說：「聽得多自己都心思想買，加上兩日一夜睇樓團，有得食有得住唔使錢，雖然住麻麻哋只係三星，不過食真係好招呼一啲都唔差，我帶埋兩個仔一齊去，一團有三十幾個香港人，去到經紀講到好吸引，俾六萬元訂金可以留住兩間樓，仲話手快有手慢冇，我驚走寶即刻落訂。」其他團友食完飲完已經坐旅遊巴回香港，只有他一家留下簽約，經紀叫他放心會包車送他回香港，前呼後擁好多人招呼，搞到晚上八點才簽完約，當時他還以為執到寶，結果才發現是一個陷阱，不過自己衰貪心都有責任。
問他還會不會再為兩個兒子置業？他說：「一定會，不過會醒目唔再貪心，之前經紀話一坪一萬元，買一送一即係五千一坪，原來租才是這個價錢，如果買樓有正式業權，起碼三、四萬一坪，香港樓價貴到買唔起，所以都打算再去大灣區睇其他樓。」