連詩雅甜曬首張全家福　自爆出院望住BB感觸爆喊

連詩雅（Shiga）上周四（18日）剖腹分娩，誕下5.9磅女兒Camila，於產房拍下首張一家三口照後，今日（24日）在社交網貼上正式的第一張全家福，並留言：「原來咁就過左（咗）差唔多一星期，現在已經係媽媽啦，出院個刻望住BB，突然間好感觸哭起來，咁就過左（咗）9個幾月。望住呢個小生命，我只係想著，好想以後將最好給她，好想好好保護她，愛護她，希望她好好成長，開心快樂活著每一天，就夠了。#第一張一家三口嘅合照 #爭咁屋企兩個寶貝 #咁就一家五口啦 #感恩 #babycamila」。

懷孕期間已肥胎不肥人的Shiga，以單肩露膊示人，有網讚：「經已修晒身」，當然靚樣不變。對當日產後抱B照被網民取笑入院生B都化妝，Shiga昨日已回應，強調做了「植眼睫毛」，令自己素顏時也有化妝效果。Shiga說︰「用孕婦都安全用嘅膠水，植咗上下眼睫毛，咁就日日起身都可以FULL MAKEUP咁啦！冇搽其他嘢都可以做到呢個效果﹗」