陳卓賢（Ian）一連七場的《IAN CHAN“TEARS” IN MY SIGHT SOLO CONCERT 2024》將於下星期五（19日）開鑼，排練亦進行最後倒數階段，Ian特別透露製作詳情，讓歌迷可以事先窺探當中玄機。
演唱會以「Tears」作為主題，Ian詳細介紹道：「今次係以唔同嘅眼淚做主題，所以喜怒哀樂，各方面嘅眼淚、情緒都會存在，所以歌曲安排都會係圍繞住呢啲情緒，希望大家唔好帶任何前設入場睇，嘗試一入場嗰一刻，就投入當刻環境。唔好諗住入去之前要準備啲咩，要聽啲咩歌做定功課，其實係唔使，純粹享受當下。」
Ian表示編曲上會帶給大家震撼的感覺，「因為音樂班底陣容鼎盛，樂隊以外，亦有弦樂同管樂，所以好多歌曲，會因應我哋今次會合作嘅音樂班底，重新編曲同調整，相信會為大家帶來一次音樂盛宴體驗，而我自己亦會參與不同樂器演奏部分，大家敬請期待。」
除了演奏樂器，Ian在今次音樂會當然亦會一展舞技，不過他覺得跳舞已經不是最難Handle的部分，「因為而家跳舞叫做進步咗少少，跳舞方面已經冇咁大壓力，但今次會多咗唔同嘅嘢要兼顧，係需要focus多啲。以往某啲演出淨係負責唱歌，但今次參與部分多咗，就要做每樣嘢都要應付得好啲，focus啲、專注啲。」
若觀眾想全情投入Ian的音樂世界，他還特別給大家一點提示，他說：「大家入場着舒適嘅衣服，最好帶條手巾仔，可能大家會有啲感動嘅。我唔係要逼到大家喊，而係希望大家會體會到當中想表達嘅message，然後relate到自己生活上嘅事情而有啲感受，純粹預備下手巾仔啦！」
