媽媽級女神陳嘉寶（Anjaylia）17歲入行當模特兒，憑一雙大大眼睛與秀氣的臉蛋，從青澀的時代走到今天，結婚生小孩，踏入人生的另一旅程……
Anjaylia 2017年跟初戀男友黃頌祈（Epaphras）拉埋天窗，兩年後誕下大女兒Hosanna，去年再誕下二女Eliana，細女兒只得十個月大，今天，Anjaylia向大家再宣布喜訊，現正懷上第三胎五個多月，完成組織大家庭的心願！Anjaylia與丈夫均出生於大家庭，二人早有共識，為建立大家庭而努力，Anjaylia充滿喜悅說：「多謝大家嘅祝福，我又做媽咪嘞！第三次，感覺熟識又有啲陌生，依然好驚喜，因為小朋友係一份天父賜嘅禮物，我同先生都有計劃嘅，只係冇諗過份禮物咁快又再嚟，好感恩。我同先生嘅屋企都係大家庭，知道小朋友可以一齊成長會好開心。」
為保持神秘，Anjaylia暫時未有透露BB性別，她表示這次懷孕較之前累，幸得丈夫在身邊支持照顧，她大讚Epaphras是個滿分的丈夫與爸爸：「佢真係好照顧我，分擔好多工作，我哋都好chill㗎，唔想有太大壓力。」Anjaylia又謂很注重兩位家姐仔有爭寵的心理，不時提醒自己不要偏心，問她第三胎後會封肚嗎？她說：「三個小朋友家庭已經好大，要對佢哋公平，好好照料同教育佢哋，對我哋都要公平，我同先生都有自己嘅夢想同事業，要一路行落去，未必有心力再應付小生命，個肚點都要封住先嘞。」
圖片來源：陳嘉寶＠Instagram
