今年10月是陳百強（Danny）逝世30周年的日子，下月7日是他65歲冥壽。93年10月25日，Danny在昏迷中離世，30年後，Danny的生前好友黃嘉豪（David）為故友推出了紀念冊，這位既是Danny唱片公司的同事，也是攝影師身份的友人，原來一直保留着由陳媽媽交給他的Danny遺物，當中包括有封藏多年的十筒珍貴菲林與及相機。David三年前將菲林修復沖曬，一張張Danny珍貴的旅遊自拍照片，近日終於「翻生」。
David說：「我既然有呢個機緣，可以講係一個承擔同責任，好好將佢整理出來。」David最想表達Danny除了是大家公認的偶像巨星，更想令人知道他對攝影、收藏品熱愛的另一面，「Danny係天生藝術家，更加係一個傳奇！」
David與傳奇Danny的淵源，要由83年David從英國畢業回港，第一份工加入EMI唱片外語部說起。那時的Danny已經由EMI離巢過檔華納，兩人前後腳進出EMI，「有個雛形嘅緣份，未正式握手！」到了85年底，Danny離開華納，加盟由潘迪生與EMI合組的DMI（迪生唱片），David才與Danny正式成為同事，「大家同事有機會傾偈，原來佢又鍾意聽外國嘢，我知道更加多Danny個性，大家有時又會去飲嘢，當時Danny已經係一個超級巨星，我哋朋友交往就係嗰段時間開始。我又發覺佢鍾意Art Collection，佢會走去赤柱女人街、荷李活道摩羅街睇古董，佢一得閒就去。娛樂圈入面，第一個發現Danny有藝術天分嘅人係何超瓊（Pansy），佢曾經話過Danny係一個真正藝術家，佢哋好friend成日傾收藏品，因為Pansy都有好多古董。」
修復Danny相機遺物
熟悉Danny的性格，David說：「只要佢認定你係朋友，佢好肯講佢嘅內心，如果佢唔當你係朋友，因為佢係公眾人物，佢好怕啲人成日挖佢私事，佢習慣咗咁多年，佢都覺得好攰，所以我哋唔會點樣問佢啲私人嘢，知道佢唔鍾意，只可以咁講，比較隨意啲，諗到有咩就講！」記者八卦，問David今次這批菲林出土，內裏有否Danny一些很私人的照片？David就說：「全部大方得體！你話有冇百厭嘢，我知一定有啲人好奇，有冇兩個朋友攬埋親熱呀？一張都冇！佢真係一個傳奇，（個人）冇垃圾嘅，全部嘢都係最靚，就算佢擺喺櫃桶底嘅呢啲菲林，都係全部靚，見得人嘅！」
除了這些菲林，陳媽媽另外還交了一部Danny的PENTAX單反相機給David，「陳媽媽講過，Danny借咗俾個鬼仔朋友，但佢跌壞咗部相機，原本壞晒撳唔到。」也許又是天意，多年來，David將這部相機帶到香港、英國，皆未能修復，竟然在上星期，他輾轉經香港一位相熟老師傳「搶救」成功，令到這部陪伴Danny多年同遊多國自拍的相機，得以修復。David隨即在其開設的《陳百強藝術家傳奇》FB專頁內召集粉絲，在周日（6日）相約到Danny半山麥當勞道寶樺台故居樓下「試機」。
問到David如何與陳媽媽結緣，原來始於他為Danny寫的一篇悼文。86年David自資創立音樂雜誌《Music Bus》，到了93年Danny逝世後，David在雜誌寫下紀念故友的文章，當時受到粉絲們廣傳，而陳媽媽看過文章後亦深深感動，透過粉絲聯絡上David，兩人認識後，陳媽媽找他整理Danny遺物，原本陳媽媽想丟掉的菲林和相機，都留在David手裏。辦過雜誌的David，近十年間分別到大陸和日本開影樓，主力拍攝工作，近幾年為籌備紀念冊才港日兩邊飛。陳媽媽今年初離世前，早已得悉David有出版纪念冊的計劃，當時她對David說：「你同我整好佢啦，總之唔好嘅東西，千萬唔好影響到佢！」
遺憾的是，陳媽媽看不到這本纪念冊面世。David說：「陳媽媽去世前，我喺大陸都同佢飲過四、五次茶。當然係一個遺憾啦，佢睇唔到呢本紀念冊推出！」說起陳媽媽晚年獨自在大陸的生活，David欲言又止，「唉，總之就複雜啦⋯⋯都係啲現實嘅問題啦⋯⋯」離去的人，很多的往事，不好說；留得下來的畫面，回味已經足夠。
（點擊以下圖片放大）
圖片來源：David Wong
