MIRRIOR成員柳應廷（Jer）的《一首歌的時間》Project，繼上星期邀來岑寧兒擔任嘉賓後，今次再邀來《約齊靈魂在墳墓開生日派對》的作曲人馮允謙（Jay），他們除了一起演繹這首新歌外，Jay亦帶來新歌《在愛面前投降》，歌曲同樣難唱，結果他們在錄音室拍攝一Take過版本時，仿如上演一場高音比試挑戰。
Jay這次親自解說了為Jer譜寫《約齊靈魂在墳墓開生日派對》鮮為人知的事，他說：「3年前已經好想寫隻歌俾Jer，一直等，而家終於有機會。Jer一做起就Send首歌俾我，我就有啲羨慕，有Carl叔叔編曲，將一啲唔同元素放咗落去，例如The Beatles，感覺好實驗性，再加上你嘅Vocal，令到隻歌真係Belong to you。」Jer笑言：「但隻歌都係belong to you，因為係你作。其實一直好想搵Jay，因為佢嘅作品係超級出色，佢係一位好有實力男歌手，所以腦海本身設定Jay作俾我嘅歌一定係好難唱，結果我都用咗好大段時間去揣摩，加埋歌詞落去先至可以唱到個感覺。」
Jay又續說：「我公司聽完首歌問我，點解呢隻歌你自己唔Keep？就連花姐都問我點解唔Keep返俾自己，咁樣好易俾人呃，不過寫歌係一樣好Personal嘅嘢，同埋真係要聽到artist把聲喺我個腦裏面，呢首歌一諗就諗到你。」Jer回應：「我好用心去唱，因為聽旋律就知道真係會好好聽，所以真係要俾心機，唔可以得失你呢首歌。」在演繹過《約齊靈魂在墳墓開生日派對》一Take過的版本後，Jay坦言：「真係好難唱，成日都問自己點解要寫啲咁難唱嘅歌，可能自己都要係旋律好聽，然後夾硬就俾Jer，因為都覺得其實佢都唱得到，俾佢唱啦！幾難都難唔到你啦！」Jer則分析：「因為Jay Fung本身唱歌嘅Range都好闊，用自己把聲嘅Standard就會寫出嚟都係咁闊，所以同本身作曲人嘅Range有關，證明Jay都係一個好犀利嘅唱作歌手。」
Jay今次帶來自己的新歌《在愛面對投降》，原來同樣是高難度作品，他表示：「唔知點解我寫啲歌都係要咁高音咁難，我自己錄歌時喺錄音室唱過好多次，所以好知道有啲位我應該要點唱，例如邊度要用假音，邊度要抖氣，For Jer知道唔係好夠時間練，但都唱得好好。」Jer則分享了自己如何準備，「我用咗一個禮拜時間操熟首歌係咁聽，因為Jay啲歌喺Playlist都會聽到好熟，但呢首因為未出街，Prepare嘅時間唔係好多，但係好好聽，係一首好入心嘅旋律。」
Jer與Jay對上一次合作已經是3年前的網上音樂會，今次在Studio合作，Jay看得出Jer的轉變：「多咗好多信心，因為3年前第一次合作嘅時候，Feel到你有啲緊張，但而家絕對係Relax。」Jer表示：「而家係識得喺緊張嘅時候扮唔緊張，其實內心都好緊張。」同樣地，Jer也看得出Jay的轉變，「Jay係再超級穩定，佢寫嘅曲風愈嚟愈有層次同埋味道，特別係佢幫我寫嘅新歌，係好好！」Jay聽到隨即𢱑撈，「你都唱得好好，搵我多啲寫歌可以嗎？」Jer即爽快答應：「冇問題，爭首R&B。」Jay透露常常聽到樂迷代Jer邀歌，希望日後有機會成真。繼上次網上音樂會，到今次到Studio拍攝，Jay與Jer的攜手演出，總欠缺了現場觀眾，二人都坦言期待將來有機會來一場有觀眾的演出，Jer表示：「Live嘅感染力再強啲，For我哋兩個都係咁鍾意唱歌嘅人嚟講，一定會唱到現場觀眾好入心，好被Touching感覺。」Jay亦認同：「我都想同台演出，因為唔知點解我哋由3年前到而家，一直合作都係網上，可唔可以下次做真嘅Show？！」Jer聽到Jay的訴求，也搞笑地作出呼籲：「聽到呢段說話嘅，記得搵我哋！」