「泰國通」胡慧冲（Roger）自2016年起，為無綫拍下旅遊節目《冲遊泰國》，早前傳出第七輯之後「壽終正寢」。人在泰國的Roger，向本刊透露最新動向，原來《冲遊泰國》已落實加碼再拍多3輯，由J2主腦C君拍板叫胡慧冲留低幫手。正在曼谷、芭堤雅連日趕拍節目的胡慧冲說，除了保留到《冲遊泰國》招牌外，其自家粉絲團將推行會員制，部分收入更會幫助流浪貓狗和受情緒病困擾人士。
最近正式動筆簽約加碼拍多3輯，「啱啱TVB同我簽咗contract，一簽就簽咗三輯，如無意外出年1月、6月同12月都會繼續喺J2播《冲遊泰國》。」加人工留低？胡慧冲說是美麗的誤會，「其實唔係加咗人工，係加咗製作費。加製作費係咪等於加人工？梗係唔係啦，譬如我主持之中，有一個叫鄺玲玲（叉燒姐），大家都覺得佢幾吸睛、幾靚女，但無奈佢人工都高㗎，變咗製作費係高咗。你俾一舊錢我，我寧願做得好好個製作俾大家睇！」
「我自己都係受害者」
連日在曼谷、芭堤雅兩邊走趕拍外景的胡慧冲，除了為節目做準備，更為自家粉絲團推出的會員制賣力。在Facebook旅遊專頁擁92萬粉絲人數的他，希望推出會員制計劃，吸更多粉絲之餘，亦不忘回饋，「有啲會員卡俾佢哋，我經理人亦幫我搵緊一啲商戶，希望俾到優惠會員。一路都有人想我搞胡慧冲旅遊團，但以前我同其他旅行社有合作，未必好容易搞到，我期望2023年真係可以搞我嘅胡慧冲旅行團，同一班支持自己嘅人去玩、去食嘢，一齊開開心心。」
不只飲飲食食的，背後更加有意義，胡慧冲會將部分會員制收入幫助流浪貓狗，「流浪貓狗都有佢嘅生命，佢哋唔係贏在起跑線，或者唔夠可愛就俾人遺棄，我希望透過我呢個計劃，年費之中撥5%去資助一啲機構，去幫流浪貓狗、流浪寵物，希望佢哋亦都有一個健康快活成長。」另外，胡慧冲更將會開設新平台，讓有情緒問題人士，多一個抒發出口，「現時經歷疫情之後，好多人有多方面情緒出現好多問題，我自己其實都係一個受害者，但係我情況唔嚴重，我好希望喺呢個計劃之中，能夠幫到有關人士，能夠盡快得到一啲痊癒。解鈴還需繫鈴人，點樣令到自己情緒，返回去以前最好狀態，靠自己之餘，亦都要身邊人去幫手。」
疫情令旅遊業停擺，可幸胡慧冲堅持在疫情期間亦在其YouTube頻道「一日一片」，報道了不少泰國的疫情和市面情況，不過，早前發生港人爆被「賣豬仔」到柬埔寨慘況，泰國有傳成為中轉站一事，胡慧冲當時亦受到網民攻擊，「我受過一大段網絡欺凌㗎，『賣豬仔』事件對我來說，的確好唔開心，消息傳出第一日，我已經將我見到嘅情況話俾大家聽，問題係大家覺得你講的不是事實，跟住群起攻擊；甚至乎有媒體訪問我，我都話如果大家真係太過擔心，就唔好嚟啦，變咗就係話，胡慧冲叫大家唔好嚟！我自己覺得好難受，嗰個期間亦令到我個節目hold起咗，因為嗰陣俾人鬧得咁緊要，你仲出《冲遊泰國7》可能會更加俾人鬧；過咗兩個禮拜，之後節目出返，竟然冇人鬧喎，似乎件事丟淡咗，加上水落石出，原來冇呢啲情況，大家又安心返。所以我想帶出一個事實，就算你幾逆境、幾唔開心都好，壞環境始終會成為過去，大家始終都會有開心嘅一日，依家仲有一啲喺苦困嘅朋友，都可以繼續堅持落去，然之後會有好日子囉！」正如他推出的打氣歌《沖歌》一樣，正能量萬歲！
