繼《筆觸男孩憂鬱之死》及《約齊靈魂在墳墓開生日派對》後，柳應廷Jer今日推出本年度三部曲的第三首作品《月居人》，由王雙駿監製、梁柏堅作詞及恭碩良編曲，Jer在MV中更化身獨居老人進駐月球，新歌一推出，就引來大批柳柳粉大讚，「呢個班底不得了啲造型suprise冇停過，今次個頭髮顏色加造型靚到大癲」、「呢個組合點離開得你哋」，仲有搞笑講「今年終於有隻歌唔會長到唔記得歌名啦」。
唔單只粉絲驚喜，連Jer知道由恭碩良Jun編曲，都好超級surprise！「因為好耐之前有同Carl Suk講過我好鍾意Jun嘅歌曲《月球人》，今次首歌某程度上係受到Jun呢首歌嘅啟發。《月球人》有一種宇宙大爆炸嘅衝擊，Jun唱得好rock好搖滾，一直都好鍾意呢首歌，今次咁啱又係月亮做主題，Carl Suk可以搵到Jun幫手編曲係超級開心。」Jun鼓技出色眾所周知，今次Jun為Jer編曲也露兩手幫忙打鼓，為歌曲畫龍點晴，Jer續道：「Jun不嬲打鼓勁係大家都知道嘅事實，但原來佢手結他同埋編曲都可以咁厲害！今次《月居人》裏面聽到嘅樂器，都係Jun同一班樂手彈奏，營造出整體感覺，所以係好開心可以同佢合作。」今次得到Jun的加持固然開心，Jer也期待日後能有機會與Jun來一次真正的合作交流，他更說出願望，道：「唔知《月居人》同《月球人》可唔可以合作做一個crossover呢？」
MV方面，為了配合歌曲，亦大陣仗地找來電影《明日戰記》的CG班底製作，而Jer於MV中亦化身流浪月球的獨居者，從單曲封面可見，Jer的角色因為流浪太久，留了一頭長髮，而且更變白了！Jer道：「今次《月居人》MV搵嚟好多嚟自唔同地方嘅CG後製人員幫手製作畫面，裏面會有啲星體，戰艦，銀河系出現，喺我拍攝嘅時候只能全憑幻想去演。」不過因為CG製作需時，就要稍後時間才可以面世，Jer也急不及待希望可以盡快睇到MV，因為他到現在也跟大家一樣，未見到MV成品呢！