佘詩曼、林峯、黃浩然、羅子溢等日前出席劇集《家族榮耀之繼承者》慶功宴。林峯為電影《九龍城寨之圍城》謝票後，帶埋「十二少」胡子彤趕到，並捧着粉紅色大蛋糕給壽星女佘詩曼送驚喜，全場大合唱生日歌，逗得阿佘笑眼瞇瞇，合十許願吹洋燭，余安安、張鳳妮、梁靖琪等上前擁抱她送祝福。
劇中阿佘、林峯和黃浩然三角愛情關係，令人看得牙癢癢。最新劇情講到阿佘坐冤獄，她說：「雖然坐監，但有兩位護花使者喺我身邊，其實都幾幸福。」戲中飾演阿佘追求者、富二代「Rio」的黃浩然笑說：「我記得，好似一出獄即刻又搵我借錢啦！」三人哈哈大笑。
周旋兩位型男之間，觀眾都替阿佘頭痛，黃浩然說：「我老婆都有追劇，佢話梗係揀我，唔通揀阿峯咩？」林峯贊成：「我都係咁揀！」阿佘問：「唔係問你老婆，係問你本人點揀？」他說：「咁梗係揀我啦！」阿峯和議：「我老婆都係咁講！」他們笑指浩然戲中角色對阿佘非常豪爽，取笑他是提款機。浩然說：「不過，如果我係阿佘，我會揀『高浚』（林峯飾），愛情係冇原因。」阿佘強調他們這三角愛情線發展非常緊張，面對新歡舊愛都好難揀；浩然透露劇情將與阿佘講金又講心；林峯亦透露「高浚」將面臨重大危機。
另一邊廂，羅子溢、陳靜（DaDa）和梁靖琪（Toby）均自稱是劇中「動作擔當」，羅子溢自爆網上新封號「丘家唯一男孫」令他啼笑皆非，戲中飾演妹妹的Toby說：「我以為你叫『渣男』！」又說：「我喺劇中好多動作戲，落水、跑沙灘、俾人打，女仔之中我算係俾人打得最多。」身旁的DaDa大讚Toby後空翻跌落海一幕，Toby扁嘴並指住子溢說：「你知唔知有人笑得好開心㗎！我一路游緊水，一路有人哈哈哈哈，有片為證㗎！」子溢忍笑，說：「我驚你有事呀！」
其實子溢劇中最艷福無邊，先後與梁諾妍和王敏奕等靚女有親密場面，他說：「我係愛情動作組，嘻嘻，有啲經驗咁啦！令對手舒服啲，冇乜戒心，可以放鬆，不過我都有俾人打。」有否與老婆楊茜堯一齊睇？他古古惑惑地笑說：「呢啲時候梗係走啦！啱啱嗰段時間幫小朋友沖涼，其實我有俾啲短片佢睇，佢睇完都『咦～』！」Toby落井下石，說：「係咪冇得入門口？」子溢笑說：「我膝頭哥損晒，仲未好返！」早前阿佘和和林峯網上直播時，將子溢與王敏奕劇中激咀場面給楊茜堯看，楊茜堯立即大叫，笑言要子溢回家跪玻璃！
至於劇中飾演丘家大少奶、「皓兒」後母的DaDa，預告將有一場令人震憾的動作場面，她大賣關子，還透露與劇中「老公」許紹雄戲裏戲外都非常Sweet，說：「Benz哥（許紹雄）角色人物性格鮮明，令人好安心，佢好勁，網民一致好評，封佢做『暖男天花板』！拍戲嘅時候佢幫咗我好多，而且佢份人好簡單，好鍾意食嘢，照顧吓佢起居飲食⋯⋯」羅子溢搶說：「起居飲食你都照顧埋？好入戲喎！俾我揀，我都揀做Benz哥個角色啦！」Toby加把口，笑說：「唔怪之得你咁忙啦！」