吳浩康（Deep）最近為了養家當地盤工，被網民稱為「職安真漢子」，但Deep並沒有遺忘歌手這個身份，更帶來一則喜訊，宣佈2月24日在元宵節水上樂園AQUALAND舉行個人演唱會，早前更「停工」一天為個唱拍攝海報及宣傳片。
Deep的地盤形象令人深刻，拍攝海報當日便以一身工業風造型示人，還出動私伙安全帶，即使危坐幾層高的鐵架亦毫無懼色：「其實冇諗過會發展得咁快，主辦佢哋好錫我，覺得我屬於舞台，所以幫我搞呢次音樂會。我都好多年都冇舉行個人騷，今次唔會加太多新Idea，反而想保留歌曲原汁原味。」
Deep還透露囝囝會入場支持，但不會邀請他上台做「嘉賓」：「唔會搵佢做嘉賓啦，佢仲咁細個！我都擔心佢會走嚟走去，如果唱唱吓突然扭計，我都唔知點算，唯有扮睇佢唔到，否則要抱住唱㗎喇。」吳浩康一講到囝囝便一臉冧樣。
Deep拍攝時要爬上高台拍片唱歌，還親手裝拆欄杆，看來頗專業：「其實我都擔心有人誤會我做地盤係宣傳，有啲網民話我地盤唔使做、行行企企，我都想問吓佢有冇呢啲筍工介紹！不過都唔理得太多啦，明我嘅人自然會明，唔使解釋太多。今次呢個騷會送飛俾啲地盤兄弟睇，因為平時都出生入死，所以想邀請佢哋嚟睇。佢哋（工友）揀啲歌好大熱，一定會唱㗎喇。依家做多咗工程，創意反而唔會多咗，而係怕啲工友太辛苦，唔好搞咁多嘢，最終得返兩條鐵喺度。」演唱會只開一場，Deep坦言略嫌未夠，希望粉絲能踴躍購票，打動主辦單位加場。
Deep被網民將拿張致恆作比較，他表示也有留意到：「作為佢嘅兄弟，大部分人俾佢呃過嘅嘢，我都俾佢呃過㗎喇，但係做朋友就唔會多講，我只想俾佢嘅家庭同成長留返啲空間。」
