香港人睇楝篤笑，習慣去紅館睇黃子華和林海峰，其實最raw的楝篤笑表演，觀眾是在酒吧模住酒杯底圍住睇，最近距離最直接互動，又有另一番感受。
楝篤笑演員Jordan Leung，自小鍾意整蠱同學，因一場疫情回流香港，線上線下闖出成績，下月將於麥花臣舉行的三場楝篤笑騷秒爆，這個巡迴讓Jordan可以去到全世界「講笑」。
於香港長大的Jordan Leung，15歲時往美國讀書，相隔十多年才回流香港，他成為棟篤笑演員的「根」源於小學時代，「幼稚園喺香港，跟住去美國讀國際學校，我讀書時都幾鍾意整蠱同學，又鍾意搞笑，屋企人本身唔知，第一次去家長會，老師同阿媽講我成日整蠱同學，阿媽都嚇一跳，個仔原來係？我喺屋企都幾正經嘅。」
的確，台上台下的Jordan兩個樣，面對鏡頭有點怕醜，搞笑本色不易流於表面，日常與朋友的交流，有時會變成他的題材，「可能同friend吹水吹兩個鐘，有一句我會印象好深，就會自己寫低，睇吓會唔會develop到一樣嘢，但好多時唔係咁熟嘅人，佢哋成日會問搵唔搵到靈感呀？咁又太刻意喇！」
美國生活時，Jordan由加州搬到紐約，因為一場楝篤笑，決定幹一番大事，「我覺得都去到紐約，應該要做啲新嘢，挑戰一下自己，我一向都覺得自己好笑，有一次有個friend叫我睇場楝篤笑騷，其實佢都幾好笑，但我覺得我好笑過佢，所以即刻報咗個課程學楝篤笑，跟住有個畢業show，個show都做得幾好㗎，覺得呢個係我人生mission，冇再諗做其他嘢。」
「講笑」係天分定後天影響？Jordan說︰「我覺得天分可能係七成，有啲人係好好笑，但真係上台講都係有個structure，如果未get到個structure，就做唔到一場楝篤笑出嚟，首先你本身都要好笑，我識有啲人係台上台下都唔好笑，咁就麻麻地囉。」
楝篤笑很重視表演者和觀眾的互動、反應，Jordan提示準備入場睇騷的觀眾，「唔好同隔壁朋友傾偈，有笑位自己笑就OK，唔使係咁check in你隔離個friend，如果表演者有經驗，有時都可以control到，但如果你冇乜經驗，可能呢個笑話明明中嘅，點解唔中？之後好容易愈講愈差，開始震，唔記得啲稿。」
Jordan直言，香港的楝篤笑市場競爭仍然很小，「所以先有人識我！」而最大分別，外國觀眾已經對楝篤笑有一定程度認識，他分析：「例如紐約觀眾，他們已經很熟悉呢樣嘢，就算未睇過show，都familiar電視睇過，知道大約點樣，但香港好多人都係第一次現場睇楝篤笑，佢哋個expectation和reference就係黃子華，咁你喺灣仔酒吧而唔喺紅館，都可能有少少expectation唔同。」
Jordan續說︰「香港都叫做好early stage（棟篤笑），但都唔係最early，我都留意到多咗人會嚟玩，但都係要有少少時間，先可以develop多啲talent。」問到誰對Jordan最大影響？他秒答是周星馳，「周星馳的電影，或者睇電視見到沈殿霞，個畫面係佢哋一做Live都會引到人笑，啲人一get到，好自然好開心係咁笑，可能呢個畫面對我影響最大。」
做楝篤笑演員，Jordan並不是一心想為觀眾帶來歡樂，他坦言︰「我又冇乜咁諗，啲人成日話香港人要開心啲，我唔係咁偉大，我自己想share自己talent，唔係話想令人開心啲，我想自high多啲。」
至於入行門檻，Jordan說這個行業在世界各地都有「Open Mic」（公開自願即興表演），但就一定要慢慢捱，「門檻好低，喺Open Mic第一次就可以話自己係comedian，但如果真係想做，都要有啲時間，要consistent去Open Mic，慢慢進步，慢慢睇吓觀眾反應，再執下稿，如果有啲show嘅producer覺得你OK，就會請你去做show，但一定係要捱出嚟，最少一、兩年先可以做到一場唔尷尬嘅楝篤笑。」
「Open Mic」玩法各地不同，Jordan解釋︰「New York表演者要俾錢，可能要俾5蚊美金再買杯嘢飲，你埋單都可能十幾美金，只係試，可能冇觀眾，已經冇咗十幾美金，所以嗰陣時都幾肉赤；香港就唔使，只要去酒吧賣杯嘢飲當support吓，就可以開咪！」問Jordan靠楝篤笑搵唔搵到錢？他說︰「我應該都係今年同上年先叫做搵到錢，之前冇乜錢搵到！」
《Jordan Leung Low Energy World Tour in Hong Kong》將於8月1日起連續三日，於旺角麥花臣舉行，特別設有一場英文、兩場廣東話，Jordan說兩場內容都有些不同，「有啲笑話係廣東話先表達到！」
場地︰The Fleming Hong Kong Hotel