由Chiutung潘釗彤、Geor陳樂頤、Jaime張天穎、Kay李凱翹及Winky黃健怡組成的唱作女子組合Beanies，近日推出今年的第二首團歌《小氣簿》，beatbreak曲風充滿夏天氣息，最適合暑假播放！
由蘇道哲（阿道）監製及與Jaime一起編曲，Winky、Kay及Jaime作曲，Jaime說：「歌名係同監製阿道一齊諗，創作入面，阿道分享咗啲demo俾我哋，每個人交咗自己嘅旋律出嚟，最後好似拼圖咁，剪咗依家首歌出嚟！」歌曲講姊妹之情，負責填詞的Chiutung就說：「講一班好朋友出嚟去玩，少不免申訴平日生活嘅唔開心、返工有咩冤屈氣，見朋友嘅時候，就會好似寫晒落小氣簿咁！」
《小氣簿》MV由近年香港新一代歌手熱捧的導演Kendra Koh執導，特別找來台灣演員姚愛寗與張介禎演出，短短幾分鐘的故事，已經令演出變得更立體，近乎變成一齣微電影。拍過《共犯》、《比悲傷更悲傷的故事》以及《帶我去月球》的姚愛寗，又演過日本電影《戀愛奇譚集》，一直深得台、日觀眾愛戴；而張介禎演過的電影《夢遊》，曾於紐約電影獎榮獲六個大獎，是新世代的演員之一。
MV內，Beanies五位成員飾演女主角的內在小女孩，女主角對着男主角的內心掙扎，Beanies總會出現在旁，鼓勵女主角做決定，雖然最後的結局是分手收場，但五個女孩永遠寄居於女主角內心，陪伴左右。對於第一次拍MV有演員參演，Beanies感到很榮幸及興奮，Jaime說：「由演員負責成個故事情節，俾觀眾睇到成首歌嘅第二面。」Kay說：「好靚仔、好靚女！演員們做得好好，眼神呼吸節奏好到位，我自己眼濕濕咗兩次！」Geor說：「最尾火鍋店嗰個鏡頭，我以為仲有咁多人食緊飯，但原來全部都係臨時演員，嗰時先知我哋今次咁大製作，好驚訝！製作比之前大好多，大家都用咗好多努力！」至於拍攝時的難忘事，Winky就笑言：「拍咗24個鐘，中間有機會一齊坐低出去食飯，通常拍嘢都係食飯盒，但我哋可以出去食咗碗拉麵，好幸福！」Geor說：「我哋喺天橋度同女主角大嗌發洩，但我哋要無聲吶喊，因為嗰時已經凌晨三點幾。」Chiutung則表示這天的24小時，一齊做了很多很奇怪的事。
Beanies雖然出道短短一年多，但已經歷過不少事，對於未來發展，Winky說：「我哋嚟緊會繼續出歌、唱歌，期待可以搞到Beanies嘅演唱會！」而Chiutung最期待的是：「我哋MV可以去到愈來愈遠嘅地方拍！」
