上月中,《窄路微塵》獲台灣金馬入圍三項大獎,戲中男女主角張繼聰和袁澧林,分別獲提名最佳男女主角、音樂人黃衍仁則入圍最佳原創電影音樂,最終男女主角落空,只有黃衍仁贏得最佳原創電影音樂獎。Angela說:「感受好magical,好似發緊夢。中間我都有去厠所,但要趕住出返去現場,因為想盡量感受成個氣氛。《窄路》有三個提名,未到衍仁(配樂)部分,前面嘅人攞獎,我同導演(林森)都已經係咁喊,好感動、覺得好amazing!」
金馬之後,輪到下年香港的金像,問袁澧林如果有機會上台攞獎,最想多謝誰?「林立三老師,佢係我演戲老師,雖然我都上過唔同堂,但佢對我影響最深。佢嘅教導同好多老師都好唔同,我記得讀第一個course,你唔會見到個劇本,其實我上咗三年都未touch on劇本,第一年所有嘢,佢都係crack(進入)咗你個人先!做演員,你要做返個人先囉!」來自最普通家庭
本身經歷雖未如片中要住劏房,但袁澧林坦言,自己是基層出身,而疫情對家人亦受到影響,「對我personally唔算好大(影響),我成日都覺得自己好lucky,我自己來自一個最普通嘅家庭,我都係生於基層,疫情對我屋企人影響頗大,因為佢哋都係打緊最普通嘅工,雖然我依家做緊呢一行,資源上面可以孝順返屋企人,或者生活上面嘅條件可以幫佢哋改善,但係佢哋都有佢哋生活,生活都係繼續、工作亦都係繼續,疫情影響都幾大。」家人因為疫情而失業,Angela說,「大家都知道,呢個資本主義社會底下,你一有咩風吹草動,最受壓迫嘅一定就係底層嘅人,一定係cut做最底層先,或者有咩政策改動、收緊啲咩,全部一定都係底層suffer得最多。」家擔由你來孭?袁澧林說:「可以咁講,都會有呢個壓力。」
張繼聰係恩人
擔正女一,即要挑戰單親媽媽角色,袁澧林曾經在新片的影後問答環節時,說自己ready做媽媽,引來現場一片嘩然,但今天她卻說:「梗係唔ready啦,哈哈,冇可能!我自己照顧自己都有啲問題。千祈唔好,其實我唔算好鍾意小朋友嘅人,我淨係鍾意我呢套戲嘅小朋友!」未ready做媽媽,愛情又如何?「冇呀,哈哈,慢慢尋覓下BB嘅爸爸,多謝關心。」女神說,這刻連追求者都沒有,她搞笑說:「我事業心重吖嘛,見唔見到我條事業線?哈哈!」
說到之前與Edan呂爵安的緋聞,「都否認咗啦(Edan),只係好朋友!佢係一個好叻嘅人,我都好欣賞佢,但係,No,多謝關心。」緋聞絕緣,專心事業線,2013年出道由模特兒起步,再到現在的女主角,29歲的袁澧林其實幾抗拒「文青女神」這稱號,「形容我自己?我想諗啲型啲,但又諗唔到,我覺得依家係becoming an actress,點解仲係becoming呢,因為真正去擁有呢個身分,並唔係一個nomination(提名)就代表你係,演員都有高低、有更artistic程度。我好鍾意Cate Blanchett,我會measure我同佢嘅距離,真係一個becoming狀態,我仲可以成為一個更叻嘅!」
髮型:Cooney Lai @hairby_cooney @ilcolpo_onlan
化妝:Jenny Shih @Jennyshih_
造型:Daniel Cheung @danitorial