戴祖儀昨晚（24日）到亞洲博覽館觀看韓國女團(G)I-DLE演唱會，卻遇上不快事件，她在社交平台公開被保安「胸襲」始末，求網民安慰，「話說今日本身歡歡喜喜去睇演唱會，然後因為我拎咗部相機，所以要落去樓下寄存，咁朋友就入咗去先。行返上去，過完個安檢嘅時候，就跟住前面幾個人去入場，當前面入咗去，到我入去嘅時候，個保安突然之間閂門，然後猛然推我出去，仲要推落我個胸度。」她被推出去的一刻，感覺非常委屈及不快，「雖然係女保安，但‥‥‥呢個舉動真係‥‥‥巧令人‥‥‥不快。」
