由無綫台慶劇《新聞女王》，前晚（7日）播出一集，許詩晴Cathy（高海寧飾）明知曉欣（陳若思飾）與曉薇（何依婷飾）關係，但仍堅持直播曉欣被追捕過程，結果導致SNK接獲大量投訴。昨晚（8日）一集，懷疑Cathy在事件中另有企圖的Man姐（佘詩曼飾）更出手為曉薇出氣，當正Cathy妹仔咁使，又以「私房菜」一事為難Cathy。被Man姐處處針對的Cathy約飛爺（鄧智堅飾）飲酒吐苦水，其間飛爺的「有骨感言」暗藏不少辦公室生存之道，難怪網民對《新聞女王》編劇讚不絕口。本周由高處急跌谷低的Cathy，下周將迎來更大低潮，最終幸獲王偉（林正峰飾）伸出援手渡過難關，二人更會發展成情侶關係。
昨晚一集還出現了新個案人物，就是飾演萬華排球隊隊長廖子珊的何沛珈（Roxanne），有「東張女神」之稱、兼是去年《香港小姐再競選》冠軍的Roxanne，之前憑《愛‧回家之開心速遞》的椅子舞Hit爆，這次Roxanne在《新聞女王》中將再有突破性演出，除了要挑戰喊戲及出浴戲，還要挑戰體育潛能飾演排球好手！Roxanne受訪時坦言很大挑戰，除拍攝前兩個月便開始練習，更練到一雙玉手滿是瘀痕：「呢啲瘀痕更加令我感受到作為專業運動員嘅艱辛，我好多謝拍攝之前有呢啲訓練，令我更加容易去了解角色。」
至於出浴戲，Roxanne則坦誠是第一次，並笑言冇尷尬：「因為入咗戲就會覺得成個場得返我一個，而且我着咗肉色內衣褲去做好防走光措施，冇咁容易穿崩。」Roxanne續指因為拍攝時間比較趕，要捱沖凍水涼：「因為當時未開暖水，我沖咗個凍水涼！不過現場同事非常好，準備咗熱水同埋乾毛巾畀我，好多謝佢哋嘅照顧！」
Roxanne今次亦是首度挑戰喊戲，她特別感激阿佘與李施嬅的幫助，「阿佘同施嬅都係我非常喜歡嘅演員，阿佘更加係我一直嘅偶像！嗰場喊戲係我第一場戲，仲要同阿佘、施嬅兩位前輩同場，心情都比較緊張，佢哋兩個都好好，提我要放鬆投入個角色唔使諗對白，因為子珊已經喺我心入邊，感受吓個角色諗咩就得。」Roxanne又透露喊戲場口不少，故事前也擔心自己能否勝任，幸好全程得到監製及導演信任：「佳導話佢相信我可以做到，我好感激佢嘅信任同鼓勵。」