林嘉欣早前拍攝提高大眾對肥胖症的認知和關注的宣傳片，期間嘉欣憶起高中時期的一位同學患有肥胖症，最後該同學因心臟問題離世。她說：「佢屋企三兄弟姊妹得佢有肥胖症，十幾歲已經200幾磅，個個月都要去磅重。佢坐我隔離，會成日問我有冇散紙，我有就俾佢。原來佢屋企人唔會俾錢佢，因為驚佢買零食，仲會自製飯盒俾佢。後來我發現好似好心做壞事，之後佢每次問我，我都會話『唔好意思，我冇散紙呀』」。
嘉欣後來出席舊生聚會時，從校長口中得知對方離世的消息。她說：「校長同我講佢過咗21歲生日就走咗，因為肥胖症引起好多身體嘅狀況，Heart Condition唔好，知道咗之後好心痛。」她還透露對方唱歌很好聽，對於好友的離世感到非常惋惜。嘉欣說：「同學呢個經歷令我明白到，如果你有肥胖症，係可以諮詢好多專業人士意見，監察住肥胖嘅狀態，呢個好關鍵，為咗健康嘅生活。」
至於今年的工作大計，嘉欣表示：「會不停飛，好開心會有好多新嘅合作夥伴。6月8號至30號會喺位於台北嘅純Object藝術空間舉辦我首個陶藝展，會由香港帶31件花器創作到當地展出。今次我要做比較大嘅器皿，練習時都不停失敗。呢個係一個新挑戰，從中學習，今年年尾就會拍戲。」