日前，泳兒（Vincy）、黃明德（Dark）、黎展峯（Andy）及洪助昇（Aiden），一同出席於海洋公園水上樂園Aqualand舉行的《New Bomb音樂會》。四人預備了多首歌曲，炒熱氣氛，Andy及Aiden更唱到除衫，將氣氛推上頂點。
最近經常出席「濕身音樂會」的Vincy表示，當日帶隊三位師弟開唱，Vincy坦言愈來愈喜歡唱戶外live show，「覺得自己開始有少少比較『E』咗，入面有好多energy需要放出嚟，所以今年都做咗兩隻歌特別tailor made for live show，可以同觀眾多啲互動。」事先張揚會以泳衣打底的她，當日卻表示「冇泳衣打底」，「襯唔到呀，不過我黐咗好多膠紙打底，哈哈！因為驚出汗，怕件衫會跣落嚟！」除咗服裝，Vincy在化妝及髮型上都早有準備，「化妝師幫我化咗防水妝、髮型師就幫我整咗wet look，流汗都唔會好覺眼，流汗都唔會塌呀！」而Vincy更預先收到風，Andy跟Aiden會除衫，所以她亦特別預備了兩套衫出擊，「見Andy同Aiden佢哋除衫，咁我冇得除，所以為咗贏取觀眾尖叫聲，我決定換衫，我都唔執輸！哈哈。」
原本穿長袖衫的Andy跟Aiden，唱得興起時都脫去外套，Andy背心上陣，露出結實手臂，問他是否乘機展示操肌成果，他直言：「難得氣溫同氣氛適合，展現下少少操肌成果，亦都偷偷俾自己唞一下涼！」不過原來他開show前兩個星期弄傷了頸，所以未能將最完美的一面展現，「所以做gym都唔敢做得太重，最理想當然練到上身夠大同靚比例，特別練多啲腹肌。」Aiden則以窄身短袖tee示人，話要吊一吊fans胃口，「若隱若現，吊住fans胃口先，哈哈！下一次show自己健身的成果。」相反，近日減肥成功的Dark則十分密實，以牛仔褸造型出現，「減肥成功係我第一步，之後應該會操下啲肌肉，因為我之前已經知Andy會除衫，所以喺佢隔離有啲蝕，所以我就唔除啦！」
