洪助昇（Aiden）今日（29日）推出全新派台作品《單曲循環症》。他憶述跟詞人提到現代人的愛情故事均大同小異，「發現好多人習慣咗一個人喺自己身邊，從而夾硬繼續喺埋一齊，所以呢首歌主要係用一個比較理性嘅角度討論喺愛情入面，你繼續被情感牽住，但最後未必係一個好嘅結果。」
MV連續拍攝廿四小時，Aiden早上六時便要出發，第一場更是浸冰戲份，拍攝後他差點以為自己會猝死，「拍嘅時候一開始好興奮，但拍落去發現身體呃唔到人，拍嗰日好凍，導演又不斷加冰，拍完呢場有一刻發現自己心跳好快，嗰刻好驚自己會猝死，但休息咗一陣就冇事可以繼續拍攝，我都唔係好夠膽俾同事知道，因為佢哋好錫我，一定要我去檢查咗先。」除此之外，Aiden直言有一幕更激的戲碼，「就係同mv女主角Zoe（余潔滢）嘴對嘴餵水嘅戲。」Aiden自爆對上一次拍接吻戲已經是七年前，「太耐之前啦，我唔識得點錫，已經唔記得咗。」不過因為跟Zoe是朋友，所以又變得放心，「幾年前我同Zoe喺一個acting class入面認識，因為大家係朋友，所以拍嘅時候我都好怕會笑場或者尷尬，好彩當時大家都好沉醉喺個故事入面，我亦都同自己講：『要好好咁呈現呢場咁刺激而有意思嘅戲分。』」
最後這幕互餵水的戲碼NG了七至八次，「因為第一take啲水湧出嚟好似瀑布咁，所以要好好控制水嘅流量。同埋對於我呢一種『憑實力單身』嘅人嚟講，對上一次錫係七年前嘅人嚟講，今次真係一件幾衝激嘅事。」