日前，英皇歌手洪助昇（Aiden）於IG上出po，宣布成功考獲車牌，師姊Gin Lee李幸倪恭賀兼順道宣傳新歌，留言話：「恭喜『新牌仔』！」，同公司的許靖韻（Angela）亦留言笑謂：「咁驚？」十分搞笑。
Aiden表示自己是「一take pass」，他說：「筆試一take pass，路試之前考輕型貨車，但考咗兩次都肥咗之後，就決定轉考私家車棍波！之前多數都係衰緊張，我覺得揸車仲緊張過唱歌，我一路揸一路腳震，所以成日踩break都踩得好差，去到後尾決定轉考私家車，所以考私家車都算係一take pass！」
問到考車貼士，Aiden認為除了瘋狂約教車師傅上堂，最重要是不要自我質疑，因為每次考官放下iPad時，很自然會緊張，不停想是否「被肥」，所以當緊張的時候，自己會不斷深呼吸；而衣著方面，Aiden亦有心得分享，「考車嗰日，我特登著咗公司嗰件『ABCDEEG』T恤，係冇『F』呢個字，所以就好順利冇fail！仲有就係準備定一條紅色底褲，考車我覺得運氣都佔一部分。」
Aiden又謂，成功考獲車牌後，最想接載屋企人遊車河，「因為佢哋好鍾意遊車河，我係屋企第一個有車牌嘅人，所以我都想希望快啲有部車，可以帶佢哋周圍去。」除了跟家人遊車河，Aiden亦想跟朋友自駕遊，「想快啲過完P牌之後有國際牌，可以同朋友去旅行自駕遊，去唔同地方周圍睇吓、周圍玩吓！」現在的目標是希望買車，至於Dream Car，Aiden謂一步一步來，「Dream Car我有好多部，但呢一刻自己想買一部電動車，一嚟環保啲、二嚟希望座位比較多啲，咁就可以車多啲唔同嘅朋友、屋企人去玩！」