炎明熹（Gigi）日前出席記者會正式公布將於10月7日於九展Star首個個人演唱會，門票於今日早上10時公開發售後，歌迷反應相當熱烈，在早上時段，雖然大約等15分鐘便能夠順利地進入購票頁面，但未能成功付款，最終空手而回。快達票網站，更於早上11時半許，在網頁顯示「全部售罄」。
首個公售演出得到廣大樂迷支持，當Gigi得悉這個喜訊後，難掩興奮心情說：「我前一晚仲緊張到瞓唔着，真係冇諗過反應咁好，開賣冇幾耐，我已經不斷收到歌迷喺社交網站私訊我話買唔到飛，好唔開心。」
歌迷一票難求，黃牛黨更「趁火打劫」；出名痛錫歌迷的Gigi，第一時間向公司反映問題，主辦單位亦迅速採取應變措施，決定加開10月8日終極尾場。
Gigi謂：「之前睇啲前輩歌手開演唱會嘅報道，會煩惱歌迷買唔到飛，又會心痛佢哋幫襯黃牛黨，依家我終於感同身受，好多謝公司配合，好快就應承加多一場，但因為場地問題，唔可以再加。我想喺度呼籲我嘅歌迷，真係唔好幫襯黃牛黨，希望加場之後，大家都可以買到飛。」
Gigi坦言雖然決定加場後，令自己的壓力大增，但為了答謝歌迷，將會盡最大努力，好好完成兩場演唱會。「正如我前日喺記者會上講，只要我攞起支咪，就會珍惜每一次演出，唱好每一首歌，為咗多謝歌迷嘅支持，我會雙倍俾心機。」
