「三太」樊亦敏（Amy）是「入道弟子」亦是「乩童」，她昨晚（3日）作客梁思浩主持的《直播靈接觸》節目，分享了不少參與扶乩儀式的親身經歷，及自身靈異經歷。Amy透露她身邊不時出現「朋友仔」，他們更很樂意幫她「熄電視」或「熄燈」：「嗰晚我喺酒店睇你（思浩）食火嗰集，睇睇吓突然全間房嘅燈熄晒，電視機冇熄到，原來係好多朋友仔一齊睇緊。其實我喺自己屋企都試過，有次我講緊電話、睇緊個節目，我就話如果我唔使行埋去熄電視就好喇，點知3秒就熄咗個電視，然後我話我未睇完，你可唔可以開返呢？佢就自己開返。」
之後Amy又分享了已離世朋友報夢道別的故事。Amy說：「我唔係第一次夢到呢啲事情，嗰日我夢見一個老人家同後生仔，師傅話佢哋係嚟睇吓我同我講再見。嗰位老先生，佢走（離世）時我有出分力，但反而後生嗰個，我諗嚟諗去諗唔到係邊個。」之後Amy終於想起該名後生仔是曾在另一家公司拍劇時合作過的，並謂最後在另一名曾在該公司工作的前同事幫忙下，找回與該名後生仔的相關記憶。「我哋合作得好愉快，但突然間個男仔冇再出現，原來佢腦Cancer走咗。」
見聞多多的Amy，還分享了一名女性朋友險些誤墮「性交轉運」騙局的驚險過程。「我有個朋友流產、情緒好低落。有朋友就介紹咗啲師傅佢識，師傅話佢前世做咗有啲嘢唔好，所以同子女無緣。」Amy續指該名師傅吩咐其友人私下獨自找他作法，作法前更向其友人說：「其實你個樣都生得幾靚，你咁後生都仲有機會（再生B）嘅……你身體太多陰氣、要驅走，我係師傅好多正能量，我有個獨門方法可以向你注入陽氣。」Amy指師傅一說完便行近其女友人身邊並叫她坐好，幸好友人老公於千鈞一髮之際瘋狂拍門阻止事件。Amy語重心長說：「大家情緒憂傷時真係要警惕，睇清楚個師傅係咪真係可以信賴。」思浩聞言亦和應：「過往廿年我都揭發咗唔少神棍，其實好多方法都可以轉運。」Amy接着說：「種善恩得善果、令自己正能量多啲都係一個方法。」
另本集一開始，思浩即宣布6月25日是最後一集播映日期，隨即吸引大量網民留言要求「加碼」，思浩事後受訪時笑言：「真係好多網民留言要求加集數，希望高層聽到啦。其實我哋節目反應真係好好，聽同事講個節目熱度每星期都一直係咁攀升，開心之餘亦令我哋更唔捨得個節目完。」