羅毓儀（Yuki）與冼靖峰在劇集《神耆小子》戀情剛萌芽，甜蜜咀嘴後，昨晚（31日）播出的一集就要分手，原因是Yuki的角色突然黑化。昨晚講到大海（鄭則士飾）入院做手術，事前將公司交給孫女多多（Yuki飾）管理，但暫代CEO的多多接手錢萬世後動作多多，竟趁着大海做手術期間改掉公司簽名，又強逼老臣子佳叔（陳榮峻飾）放假。做完手術的大海捱過危險期順利出院，回到公司及錢家後卻驚覺大變天！
由純純兔180度變成奸爆Big Boss的多多亦不再隱藏自己，向大海等人終極攤牌明言要搞冧錢萬世：「其實我8歲嗰年就知自己唔係你親生孫女，我一直對你咁乖咁聽話就係等一個機會，放長線釣大海！」大海聽畢大表難以置信：「你呢隻指天椒真係辣。」反骨無極限的多多再向大海說：「點呀？執咗隻唔識報恩嘅流浪貓返嚟，仲要俾佢反咬一啖，痛呀可？不過我都係跟你學嘢㗎咋，喺你心入面親情根本不值一提，我學得似（你）呀可？」
入行5年有「御用學生妹」之稱的Yuki演開乖乖女，今次首度挑戰黑化做奸角，Yuki大嗌超級好玩：「我第一次做會黑化嘅角色，都會怕自己拿捏唔到個變化，所以前期都做咗好多功課，會分析角色嘅背景、性格同心理變化，了解多多黑化嘅原因同動機，之後拜托屋企人幫手，特別係阿妹同我對戲。」講到昨晚攤牌戲，Yuki坦言有難度：「Kent哥係大前輩有番咁上下氣場，要同佢對峙氣場一定唔可以低，但我不嬲俾人甜妹感覺，簡單啲講即係唔夠霸氣。我拍呢場戲嘅時候冇壓力就係假嘅，但我都會盡量放鬆同信任對手。」
今晚來到大結局，玫瑰（樊亦敏飾）和小鮮肉阿Jack（吳子冲飾）的關係今集將揭盅；向來專制橫蠻的大海被多多奪權後，終於反省自己一直以來的過錯，決定鼓起勇氣補救與兒子繼來（曹永廉飾）的關係，又會以身犯險救回金叵羅贏回玫瑰芳心。另邊廂，阿勇（蕭正楠飾）和有方（傅嘉莉飾）幾經磨難才重修舊好，阿勇亦買了戒指決定向有方求婚，怎料前往求婚途中發生意外，有方嚇到失聲痛哭；至於終極黑化的多多，Yuki大賣關子說：「多多黑化背後係有一場更大嘅計劃，大家睇埋大結局就會知道。」
大結局圖片：