Serrini是一個「宗教」。
近日在《Chill Club》頒獎禮榮登年度女歌手的她，即將開設一間「樹店」，除了有音樂、藝術品、書籍與畫作外，還有香爐和燃香，Serrini笑說：「有朋友問我係咪起間廟俾自己？」
甚少聽到Serrini談及家庭與愛情，今次，呢條女大講特講！
四年前，Serrini的《Don’t Text Him》、《油尖旺金毛玲》等在網路爆紅，她沒有唱片公司，那時候傳媒都找不到她，Serrini第一個訪問就在《明周》。她仍記得當日的笑料，「當時覺得自己係文青嘛，做訪問唔使整頭，好hea，上到去先知原來做訪問要影相拍片，我好後悔囉！另一個我好後悔的事，係HKU有日叫我返去影相，我以為只係影普通學生相，原來要放落網頁，所以最近再叫我返去影相，我即刻𦧲飯應，著返件Vivienne Westwood先去影。」
要說Serrini的音樂與自信，或多或少是被父親薰陶，「我爹哋好鍾意聽許冠傑，亦都好鍾意聽英文流行曲，他不會理身邊人講乜，自己喺度唱囉，我諗呢份自信，我自小已根深蒂固，令我知道懂得自我表達係一件好事。」她也想不到，長大後竟被許冠傑邀請擔任紅館演唱會嘉賓，最開心當然是台下的父親，「我未見過他咁興奮！」
原來，Serrini的母親對女兒入行，起初不大贊成，「其實都是來自愛，主要是覺得好辛苦，一個女仔企在台上，驚我俾人鬧，又要成日周圍飛，寧願我做個普通OL！阿媽話做OL咪幾好，放工可以踢對高跟鞋去食飯行街，幾開心呀！我就話，我依家喺人哋返緊工，都可以踢住高跟鞋去食飯喎！爹哋呢？佢同啲friend打牌時候會講起我，佢會用『特別』呢個字形容個女，話阿乜姨都覺得你好特別㗎！」此時此刻，是與父母關係最好的是時候，「現在，應該是我們家庭關係最好的年代，好直接地溝通。以前細個，父母會話對我有甚麼期望，直接order落嚟，或者唔想我做音樂，以前心裏面會話『you are just my hater』就算，香港地，通常子女畢業，父母都希望他們做政府工、醫生律師，我用咗好長時間去同父母溝通，我唔甘願嗰種（生活），佢哋第一句就話『唔好啦』，我唔會接受，只是他們呢一刻get唔到我諗嘅嘢，我就prove俾你哋睇，這是一個好平等的溝通。」
今年三十三歲的Serrini，身為九十後的一代，與父母有獨特相處之道，「我會monitor我父母一個星期做兩次gym、一個月睇一本書同埋睇兩套電影，我會叫他們出去拍拖食飯，跟住俾張單claim返錢，他們都會跟住做。近呢幾年，我覺得大家個understanding大咗好多，我唔知道香港子女跟父母關係，是否個個都咁幸福？我就覺得自己好幸福，因為父母願意去改變、願意去試新嘢，有時父母會限制子女發展，或者唔尊重，都係因為他們以為嗰個係愛嘅方法。」
最近推出的新歌《月色魔美》，Serrini說這首歌是她即將推出大碟的ending，「新碟會將過去幾年作品collect成為一張十七個tracks的大碟，中間我又design咗一啲過場音樂，會有幾首新歌，《月色魔美》就係隻碟嘅ending。隻碟叫做《Rage In Peace》，講述有啲嘢我唔妥協或者唔高興，現今每個都市人，都有唔同瘡疤創傷，我哋點樣慢慢將呢啲嘢疏導出去呢？又或者我點樣將呢個情緒釋放呢？造呢張碟嘅過程，係一個自我認識過程，想讓聽眾同時認識自己，背後意義大過我造一個流行音樂project，bigger than any攞獎呀、首歌好hit呀，又或者接好多廣告，我係明星嗰啲！對我嚟講可以有，但唔係一個最令我覺得有成功感嘅事。」
講到成功感，Serrini透露她的「樹店」即將開幕，「最近全程投入開設一間社區中心，叫『樹店』嘅地方，喺我以前間大學附近租咗間舖七百呎，有戶外環境，裝修緊，我係咁send裝修相俾啲friend睇，佢哋話我黐線㗎？你想做乜、賣乜呀？我話唔知㗎，賣吓二手書啩，依家仲諗緊，但裏面會有部夾公仔機，有我和其他樂手推介嘅書。我好想整一個好靚、好人性化空間，令人好舒服咁行入去，就算喺大商場買得起名牌袋，都可以享受呢一種小小幸福，不過唔係cafe，因為我唔想攞飲食牌，只可以飲水囉，主要睇吓我嘅收藏品。呢幾年我買咗好多好靚嘅畫，有illustrator作品，又或者唔同art pieces，唔想只係擺喺屋企俾自己觀賞，有啲似係我嘅gallery。有朋友問我係咪起間廟俾自己？諗諗吓真係好似，哈哈！擺啲樹仔燈喺度，又整咗自己個樣嘅香爐，有啲crossover燃香，真係好似宗教物品喎！」
入廟記得要拜神，Serrini再說：「我同媽咪講嗰陣，佢問我依家係咪好有錢？唔係喎，呢個業主好平租俾我，我有個好lucky平租嘅體質，通常啲女星會住好靚好貴嘅地方，我依家住緊嗰度，其實好靚，係幾個婆婆擁有嘅apartment，佢哋收我勁平租，又唔係好理我，佢哋直頭唔知我係邊個，只係覺得呢個女仔都乖乖哋，又準時交租！疫情期間仲減租，我所有friend知道咁平租，佢哋都好愕然，覺得有冇搞錯呀？呢個世界好唔公平！我覺得好感恩，原來我對呢個社會或者宇宙，有一個positive態度，我就embrace（擁抱）到我嘅luck，例如我會遇到好好嘅人，工作上遇到好好嘅deals、遇到好好機會，未必好多錢，又或者突然之間開到一個好多贊助嘅演唱會，對於我嚟講係好好機會，原來我可以去學校講talk。」
由開始創作音樂，到現在去到第十三年，究竟做獨立歌手賺唔賺到錢？「我覺得so far合理。朋友話我，見到個戶口有錢，就即刻使晒去拍MV，我都反思緊呢個問題，所以最近都會做啲儲錢plan。女士去到某一個年紀，開始要諗吓自己將來和打算，唔係只為退休，呢一刻我就可以好開心咁樣拍MV，但其實背後我都要用好多時間精神做其他工作，先可以finance自己project，what if有一日我唔係好想拍廣告，我可唔可以finance到我自己音樂呢？我可以好肯定咁講，係做唔到嘅，所以我覺得作為獨立歌手，係不能夠只用音樂維生。」
作為獨立歌手，一分一毫都是羊毛出在羊身上，可幸Serrini遇到的工作夥伴都不會獅子開大口，「佢哋都知道呢啲錢，係我自己賺返嚟，又唔會特登要使好多或者擴大個budget，我覺得大家互相尊重，我又會擺返落去做公益、去講talk，又或者我去做音樂節等等，呢啲我覺得要keep住做，先可以財政穩健，先可以繼續做多啲無聊嘢！」
花絮攝影：洪志富
形象：Katy Tsang
化妝：Anise Ma
髮型：York Ngan
服裝：Burberry、Stella McCartney、Isabel Marant、AJE. [Net-A-Porter]、 Shanghai Tang、Versace
