下周一（26日）是Gin Lee李幸倪的生日，日前她跟過百歌迷舉行生日會，現場有近二百歌迷踴躍參與，場面熱鬧。
生日會以「運動會」為主題，原來全由Gin構思，為了捉住奧運的尾巴，她說：「延續奧運熱潮，同大家一齊做吓運動，健康啲，又可以同大家近距離接觸多啲，我覺得運動好容易將人同人之間距離拉近。」當日比賽項目包括有Gin踩單車、跳舞、射籃、接氣球及空中飛索等等。一眾歌迷都積極參與，Gin亦有落場並挑戰跳舞及空中飛索兩個項目，其中「空中飛索」一項，需要坐在座位上沿着鋼索飛到盡頭，然後用腳撐牆回彈，不過Gin嘗試了多次都未能成功回彈，她更拋出網絡金句：「你個嘢壞咗呀！」引來全場爆笑！當她再次挑戰時，過程中由頭尖叫到尾，可謂「丹田吶喊界代表」。
切蛋糕前，Gin分享了這一年來成立歌迷會的點滴，她說：「話咁快就一年，我記得上年生日會，我宣布會成立官方Fan Club，於是我哋有咗『GLFC』；呢一年來真係一啲都唔容易，冇你哋支持係冇可能實現到咁多唔同大大細細目標，所以好多謝你哋！」Gin更表示成立歌迷會，是想給歌迷最好的福利，「其實我十幾年前，已經講緊呢個宗旨㗎啦，我嘅口號係『一起變好 一起變老』，我希望繼續喺呢個『GLFC』大家庭裏面，同大家繼續一齊成長。」
