葉巧琳（Mischa）在20年參加《造星Ⅲ》，當時已入行8年的她，以「最後一擊」心態盡地一煲，最終贏得第五名，亦令人氣大翻身。三年過後，《造星》已成回憶，葉巧琳繼續行下去，跨界舞台劇、微電影，去年更展開為期一年的音樂企劃。葉巧琳坦言「後造星」人生，前路再難都一定要堅持，而面對負評更有自動filter，「我唔想因為一啲我完全唔識嘅人，點解我要介懷咁多呢？」38歲勇者無懼，難得身邊有個拍拖14年的男友，經歷了兩個「七年之癢」，已認定為終身伴侶，「都係爭一個簽名，所以都唔急囉！」
新歌《綜藝魂》用了愛情手法包裝，她說：「拉闊少少，作為藝人每一次工作或者上節目，其實你都要有少少『綜藝魂』嘅爆發，點樣可以生存到。我諗返工嘅朋友都會遇到呢個問題，你點樣面對你嘅Boss？點樣面對身邊同事？唔多唔少都會用到『綜藝魂』呢樣嘢！」即是表裏不一，有時難免要做下「雙面人」！
葉巧琳的愛情經歷也相似，「我另一半都同我講，佢識我嗰陣時，同我依家係兩個人！我講一個example，我好記得啱啱同佢一齊嘅時候，扮到自己好似好大方，我仲返緊學，佢話要同一個女仔單獨去食飯，我好大方話好呀、你哋去啦，佢覺得我好大方，但其實我勁唔想佢同個女仔單獨去食飯囉！我哋頭嗰幾年，佢仲要喺外國讀書，我哋分隔兩地，嗰時仲用緊MSN，我好記得，佢嗰個女仔打俾佢，message係粉紅色字，我勁唔鍾意嗰個女仔，都有呢啲小小爭辯，但係嗌到話分手就真係冇！」
與男友一齊14年，經歷了兩次「七年之癢」，「經歷咗兩次『七年之癢』，我哋信任100%！如果我真係唔想佢做，我直接講，我唔想你去踢波、我想你今日陪我，我會直接講，佢做唔做係另一回事，at least我都同佢講先。」14年愛情長跑，同居生活亦有6年時間，下一步自然是結婚，「絕對會行呢一步，但我又無乜所謂，都係爭一個簽名，所以都唔急囉，都住埋一齊咁耐，我覺得我工作可能再穩定啲、再好啲，我先至去做！佢係想有小朋友，但我哋都agreed咗，唔會喺呢個時候有小朋友，佢知道我唔想有，因為我屋企有兩隻貓，我已經當佢哋係一對仔女，我好crazy，其中一隻貓有少少腸胃問題，成日都嘔，變咗我疫情已經冇得飛，依家大家飛晒嘅時候，我都唔會去飛，因為我要留喺香港照顧佢哋。如果我真係有一個人類Baby，我會自私啲講，我會覺得冇咗我自己，所以暫時都唔會考慮。你問我五年後十年後會唔會後悔，到時再算啦！」
女人背後的男人
一直以來保密工夫做足，葉巧琳的圈外男友從未公開曝光過，她笑說：「其實我冇打算公開我呢個男人，究竟係邊個呢？我絕對唔會公開㗎，可能我公布結婚嗰一日，我就話俾大家聽。其實佢唔係好想我公布，佢真係收得好埋，好多concert佢全部都有嚟，但佢會永遠喺我側邊行來行去，佢會自己識閃開一邊，做一個女人背後嘅男人！」
有背後的男人在身邊支持，葉巧琳可以安心專注唱歌事業。永遠正能量的她，遇到負評，有自動filter過濾，「老實講句，我唔睇嘅，我有同公司講，如果有啲咩建設性嘅嘢，佢哋可以話俾我知，佢哋幫我做咗個filter，太難聽嗰啲就無謂自己去聽啦！我唔想因為一啲我完全唔識嘅人，點解我要介懷咁多呢？」最介意係咩？「可能唱歌好難聽，係咪會好介意？因為我已經麻木咗，話我肥嗰啲，已經唔介意啦！我要話我肥嗰啲，你唔該照下塊鏡，你係咪肥先！我覺得呢啲人生攻擊，我已經睇化咗，如果講我career，我會比較着緊啲。」
回望《造星》經歷，葉巧琳肯定的說，如果時光倒流再揀一次，她都會參加，「我一定會再做，就算我可能《造星》最後結局，未必係依家嘅結局，我都會去參加，可能我三十強已經止步，我都會再去參加，因為我覺得呢個經歷，冇嘢可以代替到，所有裏面經歷過嘅血呀、汗呀、淚呀，全部好寶貴。我諗將來老咗，如果有八十歲命，回望返都會會心一笑，覺得嗰時自己真係好勇敢同青春。」
演藝學院古典聲樂系畢業的葉巧琳，她說整個生命裏，都會選擇繼續唱歌，「始終音樂會係我人生裏面，一路行到終老！」要在樂壇生存到最難係咩？「肯繼續行落去，唔怕中間有唔如意，冇乜noise、冇乜人聽你嘅歌嘅時候，你就覺得好氣餒就放棄，我覺得最難係繼續堅持，唔一定喺歌手身上，可能年青人，追求緊自己夢想裏面，中間的確會遇到好多唔如意，慢慢去思考自己想做啲乜嘢，到你最後行到人生終結，熄機嗰一刻，你都覺得無悔，已經好足夠。」
化妝：Cyrus Lee
髮型：Milk Chan@xenter
場地提供：Studio Meta
