電影《失衡凶間之罪與殺》由衛詩雅（Michelle）及黃又南主演的單元《頭髮》，故事發展耐人尋味。戲中飾演髮型屋老闆的又南，對頭髮情有獨鍾，更會以特別的方式，收集靚女的頭髮留念，而衛詩雅則飾演女團成員，出道時因為頭髮太靚，拍過洗髮水廣告一炮而紅，可惜愈做愈霉淪為「大茄」，為爭取演出機會，到又南所開設的24小時營業髮型屋護髮，卻換來驚險一夜。
外表嬌滴滴的Michelle原來是驚慄片忠粉，她表示終於等到機會接拍驚慄片，她說：「我接到呢部戲，睇到劇本好興奮。本身好鍾意驚慄戲，造型愈恐怖愈鍾意。今次喺《頭髮》裏面我係一個女團出道後，撈極都撈唔紅嘅明星仔，唯一自豪就係把頭髮，但亦因為把頭髮太靚，而吸引呢個變態佬（黃又南）垂青。」
又南為了演好角色，刻意留鬚和長髮，他說：「戲中因為我同人溝通唔到，所以戀上咗頭髮，覺得頭髮先係我朋友，我會不擇手段，希望擁有唔同嘅頭髮。」他又指角色需要與頭髮交心：「頭髮同我呢個角色嘅關係，入面有愛，亦有安全感。更加可以同佢交到心，得我哋之間感覺到嘅嘢。」而Michelle則道出角色與自己貼近：「我會形容頭髮重要過皮膚，呢個角色同我好近，係藝人，又係入咗行好多年，目標未必做到，前設已經幫咗我好多。導演好聰明，搵到一個點令人覺得又南冇乜攻擊性，其實係更加令人心寒。」