林盛斌（Bob）與老婆黃乙頤（Pearl）育有三女一子，家中有兩個傭人，家庭負擔重，幸而Bob人緣廣又想法正面，工作總是接踵而來，卻相對陪家人的時間便大打折扣。
Bob最近離港工作，一個人在酒店房間休息時與老婆whatsapp對話，更因老婆的一番話而感動流淚。事緣Bob向老婆傾訴工作繁忙，感到很疲倦，Pearl表示明白，四名子女都很感激爸爸的付出，「我哋去camping嘅時候，我問過啲細路，佢哋一致表達非常感激你用咁多時間建立事業，俾到好穩定嘅生活佢哋。因為我哋去camping嗰度，全部爸爸都喺度，得佢哋冇爸爸，本來想疏導下佢哋，點知佢哋全部覺得冇問題。」Bob的子女認為爸爸努力工作，不介意沒有時間陪他們，Pearl鼓勵道：「所以你嘅努力係有回報㗎。至少喺大部分人覺得努力工作忽略咗家庭嘅時候，你可以兩者兼得。」
Bob看到老婆的一番話，覺得子女很懂事，安慰又感動，在社交平台分享對話截圖，又留言表示：「一路睇住佢講嘢，一路流緊眼淚，真係有電影感。老婆，感謝你努力照顧屋企。」一眾星級好友都大讚Pearl是好老婆，Bob是顧家好爸爸，「你有個懂事又細心又溫柔體貼既絕世好老婆」、「佢哋真係好識諗，感恩」、「你係一個好全面嘅爸爸」、「好好的爸爸，俾到呢個感覺仔女」。
