從未有機會碰面的二人，昨日（3日）為《東張西望》到電視城相會，Carman坦言首次見面感覺好怪：「其實咁睇我哋係唔似㗎！」輝智接着大讚：「嗰吓先睇到佢嘅功架，就係唔係完全我啲樣嚟，佢靚咁多，點解會扮到我，佢係醜化呀，最難又要做返唔識跳舞，好勁！」
輝智指當晚很多人傳Carman演出時的截圖給他，並展示其中一張，笑指似到好誇張：「冇可能唔係我嚟！」又謂當晚與子女在家看該節目，小朋友都認錯Carman是他，問他：「爹哋係咪輸咗啦？點解爹哋去咗邊呀？」輝智續謂：「我睇完係超開心！有啲人話驚我會唔會嬲，我點會嬲呀？我心諗點會嬲呀，開心到爆呀！」
Carman爆料決賽當日有人告知她譚輝智真的來了，原來對方是見到扮了輝智的她誤會了，再來告知她，超搞笑。輝智即謂想見一次Carman扮他的真身；Carman則表示想跟輝智一齊同台。隨後，譚輝智與痰輝智同框跳唱《屈到病》，二人跳得開心盡興，輝智在鏡頭前承諾：「呢條片爆嘅話，佢（指Carman）會再變身痰輝智，一百萬（點擊）啦！」
