鄭秀文（Sammi）將於七月舉行8場《You & Mi鄭秀文世界巡迴演唱會香港站 2023》紅館騷。
Sammi表示非常期待今次的演唱會海報拍攝，她說：「我今日心情又興奮又緊張，好希望拍到一輯好理想嘅海報，無論概念、造型、服飾、攝影，甚至耳環都好講究，帶出不一樣感覺俾觀眾，大家睇到就會明白。」她還透露事前認真做了一些功課：「我喺拍攝前做好皮膚護理、瞓好啲、做mask等基本準備，今日影海報呢條裙確實有少少難著，因為剪裁特別又好多元素，有舞台感、高貴感，仲有啲Punk，一套衫有咁多元素，好特別，所以我都要做好身形管理。結果無問題，已經過咗一關啦，我好滿意！」
一向身材弗爆的Sammi表示，以前飲食比較節制，現在心態較隨意，不變的是堅持勤做運動。她說：「我試過168（ 每天8小時進食），甚至204（ 每天4小時進食），但有時好想食都會照食！依家我好隨心，無限定一個食嘢方式。如果需要著套衫修身啲，就飲食檢點啲，如果套衫輕鬆啲，我有時會一日食三四餐，最緊要做運動，食多啲都唔怕！」
對於7月紅館演唱會，Sammi十分重視每項細節，她說：「除咗唱歌部分，點樣呈現不一樣嘅演繹方式都好重要，我諗嚟睇演唱會嘅歌迷，心目中對呢方面都有要求，希望多啲嘢睇、多啲元素。服裝造型，我自己都好鍾意著靚衫，好鍾意Fashion，所以呢方面一定唔缺少。至於歌曲和音樂部分，我同基爵（音樂監製梁基爵）咁多年夾得好好，我哋都想做到多嘢聽和睇，我好鍾意一個演唱會內有不同元素，亦都係我自己做演唱會嘅方向。」