陳奕迅今明(25及26日)兩日於銅鑼灣京士頓街，為新歌《塵大師》舉行快閃展覽，Eason於中午12點現身「塵大館」，為「塵大館」舉行開幕儀式，引來逾千名歌迷圍觀。即使天文台預料今日會有狂風暴雨，但上天非常愛護塵大師，整個開幕儀式大約半小時都是天清氣朗，讓歌迷可以跟Eason近距離小團圓，十分開心。直至Eason離開二十分鐘後，天氣才開始轉差，而大會亦一早安排了歌迷今早十一時領排隊籌，可以按時再回來館中打卡，所以歌迷也沒有受風吹雨打。
Eason來場時先向歌迷打招呼，然後笑道，「嘩！好耐冇試過做呢啲活動，覺得自己好似返回剛出道時期，哈哈….」但見對面馬路及街外也開始圍滿人，他不停提醒大家，「小心睇車，最緊要安全。」他之後再說：「哎呀，有啲怕醜添，同大家好近，但係又好開心好開心見到大家‥‥‥好彩冇落雨，好多謝你哋。」有歌迷大叫「我帶埋個仔來見你呀」、「我鍾意咗你十幾年啦」等等，七嘴八舌令吹神也不及回應。
Eason又為「塵大館」親手題字作開幕儀式，「等我諗下寫咩，係咪為佢加持俾啲好運？哈哈‥‥‥咁希望入來嘅朋友都可以攞到好運帶返屋企啦！」然後他邊寫邊說，「我哋做人‥‥‥其實‥‥‥梗係「係咁咦」最開心，哈哈哈。」題下「係咁咦」三個大字後，他再高舉給歌迷拍照留念，現場幾百人歡呼及跟着他一起大叫「咦‥‥‥」，氣氛非常歡樂。
Eason題字後，不忘自誇，「其實我寫得唔錯‥‥‥哈哈。呢個空間其實係我一班好有心同事搞出來，雖然空間有限，時間有限，咁都希望大家一陣可以耐心等侯，其實我昨晚已經偷偷來咗先，希望大家一陣入到去時，可以感受一下呢隻歌，領悟到做人「係咁咦」，放鬆啲嘅態度。無論係歌及塵大師的化身，都係林大師林海峰為我創造，我要特別多謝佢。」
Eason於離開時，不少歌迷都要求握手和簽名，他起初滿足部分要求，但人潮愈來愈多，擠得整條京士頓街水涉不通，工作人員及保安要催促他離去，才結束這次快閃活動。
昨晚Eason率先突然夜訪「塵大館」，幫工作人員為扭蛋機入蛋，為整個館掃塵，他又第一個試扭蛋，對應拿籤文。發覺籤文原來要浸水才可顯現，令他覺得十分有趣，最後顯現的是他抽到的限量「巨吉」，而參觀的歌迷是否可以抽到跟臣一樣的「巨吉」，就與看運氣了。
