陳柏宇（Jason）繼上次與Yellow!野佬合唱《唞》後，今次找來sica合唱新歌《可靠我》，MV亦有兩位可愛女兒陳羿辰（Abi）及陳星晴（Audrey）粉墨登場參與演出，兩位小寶貝都十分黐Jason，拍攝現場上演了一幕爭寵戲分。
今次新歌《可靠我》唱出了不限年齡、輩份、關係的互相依靠關係，只要彼此有連繫，就能成為引領對方前路的一束光，人生也會漸漸美好。作詞人陳詠謙將這份信念轉化成歌詞：「親口講過你可依靠我 成為靠你變好的這個我」、「人怎麼知道身邊一個可不可靠 等一束光」，由Jason的歌聲宣揚開去。Jason對於歌曲這份信念感受很深，面對兩個仍然年幼的女兒，向來有擔帶的他，也感受到女兒對自己的重要性，「佢哋成長過程中，需要我照顧同教導，但同樣地，我嘅生活都需要佢哋，因為佢哋係我生存目標、工作動力，彼此關係係雙向。」
找來sica的參與，為歌曲起畫龍點睛的作用。監製Edward Chan以近年流行的雙旋律並行創作模式，讓sica以甜美高八度與Jason合唱，這種八度差距平行演繹，更象徵在平行世界裏的另一角落引起了共鳴，強化歌詞的深意。對於今次的合作，sica表示：「好難以置信，我收到消息時都問工作人員『我喎？Jason喎！陳伯喎！』點解會係我呢？實在好榮幸，我本身都好鍾意Jason嘅歌，聽咗好多年，依家有一首歌，有我個名出現，係為我家族爭光！」而在錄音室灌錄歌曲時，sica對於歌詞也感到共鳴，「錄音時，我會諗起我隻枕邊貓，佢一定要瞓喺我隔離，或我頭上先肯瞓覺，我亦先可以瞓得着。」
至於MV，導演特別讓Jason這位爸爸在短短幾分鐘內，經歷與女兒成長期間的大小事情。女兒Abi及Audrey亦參與了今次的演出，Abi更是自《後排慶功宴》後再次參演Jason的MV。Jason與Abi在茶餐廳內一起吃早餐，整個過程就如平時早上開IG直播一樣，不過Jason大讚Abi：「Abi今日（拍攝當日）食嘢，明顯正經同快好多，因為佢知要拍佢食嘢，但佢做得好好，超越咗我幻想佢會出現嘅怕醜、唔想做、唔肯做、尷尷尬尬嘅佢；今日超乎我想像地完成佢嘅部分，仲比平時食得多嘢。」至於年紀較小的Audrey亦不怕生保，在鏡頭前真情流露，與爸爸Jason溫馨互動，可愛至極。鏡頭外，Abi與Audrey都十分黐Jason，不時要牽着及攬着Jason的手或腿。有時Jason只照顧其中一個的時候，另一個就會纏着他不放，結果在現場就不斷上演爭寵事件，不過Jason都十分細心，輪流氹兩個女兒開心，甚至左右手分開抱着兩個女兒，遊走整間茶餐廳，所以女兒也沒有任何投訴，Jason的臂力真是令人大開眼界！
在MV的故事設定上，Jason經過特技化妝，化身成為年老的「陳伯」，幻想自己老年後面對女兒的情景。問到Jason對於女兒將來的狂想，可有想過她們將來是屬於文靜或是好動類型，他坦言：「兩個可能性我都有幻想過，但唔一定係三歲定八十，因為唔單止係將來會經歷嘅嘢，仲有佢哋天生應對事情嘅轉變模式，所以我完全估計唔到將來Abi同Audrey大個會點，但以佢哋依家性格去睇，佢哋都係偏向outgoing（外向）。」MV裏面有一幕是女兒說自己要奉子成婚，問到Jason如果發生在自己身上會有何反應？Jason搞笑說：「睇吓佢幾多歲，如果三十歲奉子成婚，我會話『好呀！』；如果四十歲我會鬆一口氣『終於都嚟喇！』；如果十五歲同我講奉子成婚，就梗係唔同啦成個反應！」說到未成年要奉子成婚時，看見Jason作狀起腳，就知道他對於女兒有多着緊。
