陳蕾將於明年3月假紅館舉行首個個人演唱會，今日（6日）演唱會海報率先面世，陳蕾以一頭長長白髮，頭頂「念」字發出紅光，非常有型。陳蕾表示非常喜歡今次的白髮造型，創作過程也有參與構思，「我當時同同事講，《沙門》演唱會之後，由《世界與你無關》之後的歌，全部都係黑暗中有道光的感覺，海報背景可以好黑暗，我個人個妝就好白，我就係嗰道光嘅感覺，最終就有咗依家見到嘅白髮陳蕾啦！人生第一次紅館演唱會，希望海報上有耳目一新感覺，會質疑呢個係咪我嚟㗎？就最好添！我想將自己塑造成一個純白狀態，話俾大家知，無論個世界幾黑暗都好啦，我願意成為你嗰道光！」
海報出來之後，陳蕾謂第一眼見到設計師把「念」字，放在一個紅色像瞳孔的物體上，以為設計師都是動漫迷，她說︰「我係諗，唔通佢都係fans？因為我諗個演唱會名「念」，都係同動漫全職獵人《HUNTER×HUNTER》有關，入面有個角色古勒比加，佢一憤怒眼睛就會變為紅色，設計師又用咗個紅色圓形圖案，圈住個「念」字，所以我超鍾意！好多謝團隊做咗個咁好嘅設計效果俾我。」第一次開紅館騷，問到會否感到有壓力？陳蕾笑謂因為內部認購反應好，所以壓力反而少咗，通常壓力都係開騷前一個月先會來到，所以即日開始會做好自己身形管理、聲音管理同體能管理等等，免得有臨急抱佛腳的緊張，成個人ready好就會減少心理壓力，可以做得更好，「演唱會我希望可以視覺上、音效上都帶俾大家一個沉浸式體驗，唔會有悶場，絕大部分先用音樂去交流，之後encore環節先用打機來同大家再交流，但係公司未知呢件事。」
