上周在會展舉行的香港國際影視展（Filmart），多間電影公司宣布自家新戲，其中寰亞電影的攤位，打造了「九龍城寨」場景佈置，短短四日成為影視展的打卡熱點。重現「小城寨」，為了宣傳3億重頭戲《九龍城寨·圍城》，連日來監製莊澄披甲上陣接受訪問，他說，電影去年開拍時正值疫情高峰期，遇上他監製生涯的最大難關。有危有機，今年電影業翻生，破億電影誕生，莊澄對新片信心十足，坦言：「古仔可以鎮得住個場！」
「三不管」之地，莊澄最有親身體驗，他小時候正正就住在九龍城寨，「我住到7歲先走，住咗差不多四年，印象比較深就係作為一個細路仔，你以為可以周圍走，當時唔得，去好多地方都俾人喝停，嗰啲黄賭毒竇口，所以我哋來來去去都係去大街、士多。感覺最強烈係建築結構，突然之間可能有個天台，我搬走之前未起高，最多都係兩、三層，如果你識路，可以飛簷走壁捐來捐去，好難捉到你㗎！」
電影去年開拍時，正值疫情高峰期，原先在廣州搭景的計劃無奈取消，改在香港拍攝，「疫情愈來愈嚴峻，但都唔可以唔開工，所以全部搬晒返嚟香港。過程好多波折，曾經試過有人中招，中到一個地步，太多人中，冇人開工囉！好少喺疫情裏面拍戲，通常都係因為天氣呀、意外呀，但今次疫情全部lockdown晒，咁樣拍戲未試過，我嗰時仲拍緊兩部戲，所以好神奇！」
你認唔到佢係林峯
有大卡士古天樂、洪金寶、任賢齊和林峯等，莊澄說「龍捲風」一角非古仔莫屬，只有他鎮得住個場，「我諗三、四年前，已經同古生講，想佢做呢部戲，因為佢做龍捲風，佢可以鎮得住個場，龍捲風係好cool，好啱佢；另外就係洪金寶大哥，做大老闆要有殺氣，動作又得啦，佢個江山係打出嚟，所以非佢莫屬！林峯呢，你係認唔到佢係林峯㗎，哈哈，因為佢好瘦，你睇睇下唔會覺得呢個係林峯，我覺得佢落咗好多工夫，佢入咗角色裏面。」
入行40年的莊澄，是很多經典電影的重要推手，他是《無間道》系列的金牌監製，名字經常出現在電影之上，既是出品人也是監製，更是電影圈中出了名的謙謙君子。80年代畢業於中大哲學系的他，第一份工是經中學同學黎文卓介紹，去了無綫當資料搜集員，「其實我係編劇出身，我做編劇先，佢（黎文卓）介紹我入去TVB，離開咗去金公主（電影公司），然後我就秘撈跟林嶺東做編劇。」
本名莊冠男，莊澄只是他編劇時用的筆名，沿用至今。之所以由編劇轉型到監製，莊澄說了一個故事，「我試過做編劇，拍一部戲有一個flashback，我寫咗半頁紙，但係個導演話，你咁懶㗎，寫半頁紙，我哋要度六頁紙，跟住拍咗好長。點知監製就話，莊澄，你編劇都唔係咁差，點會咁冇sense寫六頁紙去做flashback，與故事關係不大，我話俾你聽，半頁紙就得喇；我話，我係寫半頁紙㗎，本來！（係邊套戲？）唔好講，哈哈哈，啲人都未死，死咗先啦！」於是，與其被人控制，莊澄不如自己當個英明的監製。除了編劇、監製，莊澄更是外語片改戲名高手，《閃靈》、《轟天炮》就是出自他手筆，當然港產的《無間道》這個戲名更是經典。
唔好意思搵子華神
問他有否想過當導演話事？莊澄說：「其實導演呢樣嘢，要賴杜琪峯，哈哈！因為我都有諗過下，但係見到杜Sir，我就唔敢做喇，原來要好厲害！」今年電影圈翻生？金牌監製的見解是：「有幾個天時地利人和，譬如子華神，佢係KOL，因為佢以前做棟篤笑，佢嘅點子好有趣而且好到肉，所以佢係一個KOL。我成日都同人講笑，話子華有戲出，唔使做嗰部戲宣傳，攞返佢啲棟篤笑片段，放喺Facebook搞掂，哈哈！當然佢係一個香港故事啦，由一個寂寂無名自己棟篤笑又俾人笑，然後變到咁犀利；仲有就係啲電影有啲玄外之音，《飯戲攻心》又好，跟住《毒舌》唔使講啦，直頭講到出口，呢啲小市民心聲真係好耐冇見，亦都係阿Jack（導演吳煒倫）聰明嘅地方！我覺得啲人對港產片有少少信心復甦，我成日都強調，亦都係杜琪峯個鮮浪潮做咗十幾年，依家創意香港有首部劇情片，又有劇本孵化，縱使係有好多未能解決嘅問題，但係幫到好多嘅！」
會否開戲與子華神合作？「我唔好意思呀，人哋票房毒藥嘅時候，我同佢合作過㗎，《人間色相》係我監製，佢都係一樣咁樣表演，但係佢嗰時未係咁神，依家人哋咁神，希望有機會合作啦！」原來剛奪得奧斯卡史上首位亞裔影后的楊紫瓊，也和莊澄做編劇年代有淵源，「我寫過《新流星蝴蝶劍》，後來我哋又有部《劍雨》，佢都真係幾nice，全行都係咁話，唔係淨係我咁講！佢唔係乜都拍，佢會諗過睇過，有啲好合理嘅問題會提出。」
說到最想合作的演員，莊澄二話不說：「發哥！因為未合作過。佢做乜都得，使乜諗，唔使諗！其實佢拍林嶺東導演《監獄風雲》時，我叫做有參與，我就係主題曲《充滿希望》嘅填詞人，發哥有份唱下隻歌，咁將來幾期待同佢合作囉！」
