劇集另一大賣點是激罕地在機場進行實景拍攝，包括中央控制中心（IAC）、綜合大樓、停機坪等，昨晚一集亦悉數登場。其中佔地5,760平方米的IAC最為震撼眼球，當中配備的巨型弧形LED幕牆更是大得誇張，飾演值班IAC經理的馬國明對於能夠經常在IAC中進行拍攝大感讚嘆：「入到IAC拍攝嘅第一個感覺係覺得好勁，個Mon好似三個戲院Mon咁大，前面可以坐到大約160個人，嗰160人後面有張枱，就係俾我劇入面個角色值班經理坐。可以幻想吓當你坐喺嗰個位時，前面有咁多人再加上有咁大嘅Mon，個Mon仲可以睇到任何資訊，好似航班升降、天氣預告、機場附近交通情況等，可以控制晒機場所有嘢，嗰種震撼力真係好大，好興奮可以坐到嗰個位！」
至於飾演機場飛行區運作經理的徐榮，則經常要在停機坪進行拍攝，為貼合工種，他在劇中不時戴上太陽眼鏡，現實中還要搽防曬。飾演機場保安的洪永城則因太過入戲，被不少旅客誤會是真．機場保安，他笑言：「拍緊嗰時真係好多人嚟問我問題，可能我個樣比較友善啦！」講到拍攝難忘事，洪永城說：「今次好好彩有機會近距離睇飛機升降，原來近距離睇真係有機會被吹走！同埋去咗維修飛機嘅地方，平時睇相都唔覺得咁大，但現實睇好似放大咗2、3倍咁。」
馬國明昨晚與蔡思貝、劉穎鏇（Tiffany）和洪永城到香港國際機場進行直播宣傳劇集時，自爆拍攝期間某天被家中愛貓抓傷面部，並留有兩條血痕，被老婆湯洛雯笑指似Hello Kitty：「監製好好，淨係Take我另一邊面。」與馬明有不少對手戲的思貝則笑說：「我哋做對手就辛苦喇，望住佢就好似望住Hello Kitty做戲咁，好Cute！」劇中飾演空姐的Tiffany則指梳空姐髮髻難度高，在劇中亦有空姐造型的思貝異口同聲表示認同，思貝又謂有向劇中曾做過空姐的蘇可欣請教：「佢真實示範過5分鐘就梳到個頭，我哋望住佢好似會發光咁，覺得好勁！」
