馬時亨．香港情｜張學友自揭有舞台恐懼 爆張國榮出場前都震晒

由馬時亨主持的訪談節目《馬時亨．香港情》，明晚（22日）首集邀得張學友及張文新擔任嘉賓，節目中曝光了不少學友初出道時的珍貴片段，除有《全港十八區業餘歌唱大賽》大合照、還有1983年的《歡樂今宵「盡顯才華SING聲星」》珍貴參賽片段，及1986年與呂方在紅館舉行的《雙星演唱會》珍貴海報。

原來張文新與張學友早於《十八區》已結緣，二人相識接近四十載，張文新大讚學友當年獲獎「冇花冇假」：「嗰時每一區起碼千幾人報名，十八區加埋超過二萬人。」張文新又笑指學友雖然甫出道已火速爆紅，但其實在勝出《十八區》之前，學友曾在歌唱比賽中多番被叮走。學友又自揭有「舞台恐懼症」，馬時亨及張文新聽畢忍不住爭相質疑，學友見狀只能舉例說：「有次喺頒獎典禮後台，我同張國榮先生一齊出場，佢喺後面係震晒嘅，我諗冇人會相信係咁，我都唔相信佢會驚，但佢真係震晒，佢問我：『學友，出面啲觀眾係點㗎？』，你哋係唔會知道我哋好多時都係好驚。」

入行快將四十年的學友，除坦言已籌劃再開演唱會之餘，又分享保持靚聲秘訣是每星期練足六日歌：「長嘅話（練歌）兩個鐘頭，短嘅話就40分鐘到一個鐘左右，專係練唱一啲自己唱唔到嘅歌。（吓？你都有歌唱唔到？）我好多歌都唱唔到㗎，好似《藍雨》我就錄咗好多次同錄咗好耐，呢啲歌你唔練一個禮拜，再唱會辛苦少少，但如果唔練兩到三個禮拜，直情係要重頭練過。」學友另外還分享了當年由高峯滑落的失落及迷惘感、對今昔樂壇發展的看法，更會開腔剖白為何拒盡千金、都堅持不為任何歌唱節目擔任導師或評審。