黃劍文、葉巧琳、鄭俊弘、陳凱彤近日正密鑼緊鼓，為下月中起共6場的音樂劇《為你鍾情》公演綵排。音樂劇以張國榮為主題，眾歌手綵排時跳唱《大熱》、《無心睡眠》經典金曲。黃劍文呻又跳又唱感難度，努力綵排盼做到100分：「最難就係跳舞，其實有啲歌我都好想唱，例如《有心人》等等，希望有機會再開Part 2時可以加啲歌入去。其實依家啲歌我都鍾意嘅，透過今次音樂劇會有更深嘅感覺。」陳凱彤就話未有舞台劇經驗，幸好依家已掌握節奏。
音樂劇公演在即，大夥兒「心思思」諗慶功，葉巧琳仲爆料已經有計劃：「啲高層已經講好咗會慶功，但地點就未定好！」雖然大家都忙於綵排，但近日港隊奧運成績斐然，鄭俊弘都捱眼瞓撐港隊：「今日就真係眼瞓嘅，因為噚晚等囝囝瞓咗之後，自己都抖一抖，半夜起身睇張家朗決賽，呢啲歷史時刻要見證嘅。」
