黃妍（Cath）的文青味不是裝出來的。隨手打開個袋，大大本村上春樹《1Q84》拿到出來，她說最近又再重睇，每次都有新的感受。她說，喜歡村上春樹的孤獨感，更自認是個自虐的人。18年才簽約唱片公司出道，今年31歲的黃妍說：「啱啱入行，人哋問我到底係咪虛報年齡，報細咗廿年！我唔鍾意出街，有一段時間我會自己喺屋企種蔥、種菜食，所有嘢都好舊派，唔係呢個時代嘅人！」
黃妍說，感情創傷遠不及經歷朋友離世打擊，至今仍未走出陰影。用音樂自療同時，亦望帶給別人力量，像她即將到英國開騷，希望給移英港人力量之餘，也為自己找回當初busking的初心。
未夠一年，本月底再度到英國開騷的黃妍，去年十月倫敦站，全場香港人的情境仍歷歷在目，「見到佢哋眼神好熱切，好想聽到廣東歌Live，我一出場已經眼濕濕。我仲遇到我兩位中學老師，一個教A-Math、一個教音樂，兩位老師都移民去咗英國，走過來問『認唔認得我？』見到佢哋覺得好感動，真係一個探朋友嘅感覺，所以接下來都會抱住一個探朋友心態，去唱歌俾大家聽！」
唱廣東歌給在英港人一點力量，黃妍亦尋回唱歌的初衷，「嗰種初衷感覺，好似去到以前出道之前，我busking就係為咗唱歌，而停下來會聽我唱歌嘅觀眾，全部都真心喜歡你嘅音樂。我本身打算俾力量嗰邊嘅香港人，最後反而喺佢哋身上，攞多咗好多好多力量，雙重確認了！我身邊移民去英國嘅朋友，佢哋超級homesick，尤其對廣東歌，你本身聽開嗰個語言、講開嗰個語言，然後可以去聽到Live，換轉係我，我都會覺得係一種很大嘅力量。」
黃妍由出道之初已有「文青女神」封號，她愛看書愛文字，新碟更有她與填詞人王樂儀合寫的同人小說，「我依家手袋裏面都有本《1Q84》！我唔抗拒任何稱呼，其實入行之前都冇想過自己係一個文青，入行之後大家都發現，我生活習慣比較舊派，唔似呢個時代嘅人。有一段時間我一出去工作，我就會帶本書自己喺一旁揭書，之後我就俾同事鬧，你可唔可以同人哋傾下偈，然後我發現原來我咁唔正常，反而大家俾我呢個稱呼，令我更清楚自己係一個點樣嘅人！」黃妍文藝到一個程度，喜歡獨自聽落雨聲，「我係一個幾自虐嘅人，我好鍾意落雨天，雨水打落去啲泥土有一種味，少少濕濕淋淋又有少少孤單感覺，可能因為自己對呢樣嘢有一個偏好，所以我睇村上春樹嘅作品，我覺得好high，嗰種mood更容易令我有創作靈感。」
從此驚咗離心力
享受沉浸式孤獨，問黃妍是否受過什麼愛情打擊，她卻說愛情創傷對她來說只是小case，遠不及她口中一位「台灣姐姐」的突然離世來得嚴重。那位來自台灣的姐姐，是黃妍出道前busking時的粉絲，兩人更因此成為好友，「嗰位姐姐嚟香港嘅時候，睇完我busking，佢就叫我下一次不如去台灣，佢會帶晒佢啲朋友過嚟睇我show，我話好我去，過咗幾個月之後，佢就喺台灣車禍。我發現佢嘅離世對我，我驚咗離心力呢樣嘢，因為嗰日佢係揸住綿羊仔去返工，然後佢俾架貨車輾過，跟住佢拖咗一個月先離開，其實一開始已經腦死亡，我哋一路都等緊奇蹟，最後我好記得係喺愚人節，佢老公喺Facebook話佢已經離開咗，嗰日愚人節，大家都唔想接受呢個事實。我之後就好驚坐好快嘅車，好驚會有離心力，我都係近呢幾年去拆解返，到底我由幾時開始好驚離心力，就算坐車人哋一飆嗰下，我就會好panic透唔到氣嗰種感覺，原來影響可以咁大！」
說來像整定。黃妍之後為她寫了一首《你還在》（廣東版《寂靜的回聲》），更完成了亡友遺願，終在台北女巫店演出，期間遇上唱片公司人員到場觀賞，黃妍被發掘才順利簽約出道。由busking到正式成為歌手，黃妍出道前試過同時間做五、六份兼職，畢業於樹仁新聞傳播系的她，連報紙法庭版記者都當過，「因為我有非常嚴重嘅面盲症，我驚入到去認唔到啲議員，我唔知點寫，我特登入立法會之前，我上網print咗佢個樣、佢個title，成個表print咗出嚟，入到去發現原來冇用嘅，因為佢哋個樣同張相係唔同。我就問隔離佢哋係邊個，我驚寫錯嘢，好彩都冇事，我下下都問佢係咪邊個邊個，都有俾人寸過嘅！」
現在當歌星的收入，不及當年又補習又打工的日子，黃妍說雖不用養家，但經濟一樣不穩定，「唔穩定係正常！咁講係咪好赤裸？我哋公司嘅management半年出一次錢，咁一定係唔穩定，但我覺得維到生就OK，搵大錢無止境，知足咪得囉，我覺得搵到食就得！」想過改變這麼低調性格？黃妍說：「我哋公司（Sony）全部人都好低調，所以我哋好似好佛系，但本身性格係咁，你要我突然之間高調，我都唔知有咩方法可以做到。我反而希望大家會去聽我嘅歌，你肯聽我嘅歌就OK，你唔使知道我係邊個，始終我都係一個唱作歌手，你可以喺我作品裏面得到message、得到力量，呢個就係我做音樂初衷，所以你可以唔知黃妍係邊個，但我希望你可以去聽我嘅作品，可能你聽完想再認識我，我都OK嘅！」
化妝：Jessica Chan
髮型：aki choi@alex so’s team
場地：Meta Stages十八夢
