白彪憑《香港愛情故事》的「大聲公」一角，在《萬千星輝頒獎典禮》獲頒「最佳男配角」，最近接受車淑梅主持的香港電台節目《舊日的足跡》訪問時，剖白與老婆的「加拿大愛情故事」。
白彪在現實中予人鐵漢柔情的感覺，家庭至上兼愛妻又護家，但原來他於90年代移民加拿大時，因為沒有拍劇工作，心情長期欠佳，時常與老婆吵架，說了不少難聽的話，最記得其中一句是「咁多樣嘢你識乜吖」，傷了老婆的心，「有一次我好衰，嗌到㷫起掟咗個花樽落道牆，仲掟穿咗個窿，為呢件事老婆要同我離婚，紙都差不多簽埋，好彩後來大家冷靜，老婆回心轉意……嗰個窿三個月都冇人理，我第一件事親手去補番個窿，連隨就補番埋段情！我梗係要做返啲嘢，即刻買香水同手袋啦！老實講，兩公婆一定有拗撬，只要體諒，各自退一步，最緊要唔好提離婚兩個字，一定好似《香港愛情故事》咁樣大團圓結局！」
白彪是第一代郭靖，當年更被金庸稱讚，指他形象戇直，很適合飾演郭靖。在1995年，白彪第三次飾演郭靖，與古天樂、李若彤合作《神鵰俠侶》，早已駕輕就熟，多年來憑劇集紅透內地，讓他可以四處登台，受人崇拜；當年與古天樂合作，白彪已看好他會紅，表示：「當年古天樂青靚白淨，成個白面書生咁，嘩！好好記性，好專業，演得好自然，武打同動作都OK，古仔行出來成個楊過咁。當年我睇佢眉目氣質，睇出佢非池中物，佢演古惑仔、談情說愛、喜劇樣樣掂……佢晒黑咗仲好，個人sharp咗，男人味出曬嚟，改咗膚色，唔知點解啲運即刻到！」他很信運，三年前甚少工作，於是留鬚改形象，果然連運氣也變好，「哈！真係即刻返嚟演《愛．回家之開心速遞》個雷公！仲有我對龍鳳胎孖孫都帶畀我好好運，帶挈爺爺攞咗個最佳男配角獎！我好enjoy做雷公，好霸道，一啲都唔似郭靖，對白唔使跟到足，同老拍檔大龍生羅樂林好有火花大鬥法，最難忘一場『楊過大戰郭靖』，過足戲癮。」
白彪又點評後輩，特別誇讚林淑敏與羅天宇，「我最欣賞大小姐林淑敏，佢做戲好流暢，每一個動作、每一個表情，我都好欣賞！而羅天宇性格戇戇直直又內向，外型都似郭靖，如為郭靖選角，佢嘅演繹方法都有八、九成似。」
部分圖片來源：myTV SUPER