現年31歲的賴慰玲（Winki）於去年年底剖腹產子，今年已經開始派利是。日前Winki一班閨密陳瀅、蔡思貝、何雁詩、糖妹、吳嘉熙約埋上佢屋企拜年順便𢭃利是，仲同Winki囝囝Marat玩到打成一片，場面非常熱鬧。而幾位契媽都好惜呢位契仔，陳瀅仲差唔多同Marat鼻貼鼻影相添。
從照片可見，身穿紅色衛衣，頭戴鮮紅色蝴蝶結頭飾嘅陳瀅（Jeannie）同契仔表現親密。Jeannie唔單只抱住佢，而且鼻掂鼻作狀親親，十足十男友仔一樣，至於Marat睇落非常受落冇反抗，乖乖瞓喺陳瀅懷抱影相。賴慰玲係大合照亦留言：「Marat仔好幸福，有個母愛噴泉，泛（氾）濫都不足以形容。」睇見咁多位契媽都惜晒自己囝囝，作為媽媽嘅賴慰玲一定開心到暈晒大浪啦。
另外，何雁詩透露咁多位契媽都有排隊睇Marat沖涼，如果唔係出於好奇，就一定係佢哋都充滿母愛喇。幾位契媽咁雀躍，唔通係因為自己都準備做媽媽？
圖片來源：賴慰玲、陳瀅@Instagram