初戀嘅味道酸中帶甜，就好似檸檬茶一樣，嚐過第一口便教人欲擺不能，十年過後也會回甘。
日前某知名檸檬茶品牌推出懷舊風格廣告片，今年同上年嘅做法大同小異，都係搵歌手翻唱經典廣告歌，再加黃黃地嘅畫面色調扮八十年代初。但筆者覺得今次最亮眼嘅地方唔係拍番一模一樣嘅構圖，或搵到本地樂隊Dear Jane翻唱蘇永康首〈Sol #4〉，而係搵到一位令人有初戀感覺嘅女主角蘇皓兒（Chloe ），細心一睇，呢個長髮look仲有啲似玉女掌門人周慧敏添！
新一代陽光女主角Chloe青春無敵，今年只係得24歲，曾當過模特兒，2008年參加《Yes!》舉辦的全港校花校草選舉比賽後開始為人所認識。其後她與太陽娛樂文化合作，於2015年成為女子音樂組合As One的成員，正式出道。睇一睇佢嘅Instagram，張張相都少女味十足，難怪今次會搵佢拍呢個充滿「初戀味」嘅廣告。
片段入面嘅長髮造型真係所向無敵，相信每位少男睇完都好難唔動心，再望多兩眼，其實佢側面有九成似凍齡嘅周慧敏。不過呢，Chloe已經剪走咗呢一把烏黑長髮，所以佢自己都話呢條片已經成為佢嘅「長髮遺作」喇。
延伸閱讀：【懷舊變成潮流】歷代陽光男神女神你最印象深刻係邊個？
延伸閱讀：【獨家專訪】王宗堯不為五斗米折腰 自認拍拖「渣斗」
圖片來源：互聯網，蘇皓兒@Instagram
影片來源：陽光 Yeung Gwong@Facebook