今晚《愛‧回家之開心速遞》播出「新春情人節」一集，劇中演員今早已急不及喺Instagram分享佢地化妝舞會造型。
見一班同事、高層扮演唔同角色，個個花足心思打扮，相當熱鬧！當中，「KC」歐瑞偉Cosplay嘅 Elsa可謂「艷壓羣芳」，同樣扮Elsa嘅「熊若水」呂慧儀、「大小姐」林淑敏完全比下去。
見KC戴上金色假髮，著住低胸長裙，仲露出事業線，打扮非常性感！KC又輕輕咬唇擺出含羞答答嘅樣，迷倒唔少網民，「KC好索」、「溫柔而堅定的Elsa」、「靚女可以做個朋友嗎？」
「迷你龍」Terry都忍不住叫大家留意舅父，留言：「今晚八點開心速遞個個都打扮得好靚㗎！」
被KC搶鏡頭，大小姐唔憤氣咁話：「大家要按捺，不要嘔，捱到最後，就會見到真正的公主了。#情人節快樂 #求你唔好咬唇。」
呂慧儀留言：「明晚，水水修女瘋狂了，水水公主嚇倒了。」
圖片來源：歐瑞偉、呂慧儀、林淑敏@Intagram